Nangasudla'g dautang espiritu posibleng psychological lang-Msgr. Binghay

CEBU, Philippines - Dili pa motuo ug mihulagway nga posibleng psychological lang ang nahitabong giingong nasudlan og ‘dautang espritu’ nga mga tinun-an sa usa ka tunghaan sa dakbayan sa Talisay sama sa nahitabo sa laing tunghaan didto sa Luzon niadtong milabay’ng semana.

Isip alagad sa Simbahan gihulagway hinuon kini ni Msgr. Esteban Binghay, Episcopal Vicar sa Archdiocese of Cebu nga posibleng bunga lang sa kahuyang sa pagtuo ug kakulang sa pag-ampo.

Niadtong miaging semana duha ka insidente ang migawas sa mga balita nga giingong na-“possess” o nasudlan og dautang espiritu ang pipila ka mga tinun-an.

Ang mga tinun-ang giingong nasudlan og dautang espiritu sa dakbayan sa Talisay giingong nagduwa og ‘spirit of the glass’ samtang ang sa Luzon nagduwa og ‘spirit of the body.’

Ang spirit of the glass sumala pa sa nagkadaiyang mga websites kabahin sa maong mga duwa, kini susama sa linahing bersyon sa Ouiji Board nga giingong usa ka duwa nga nag-abli sa pikas dimension o sa pikas kinabuhi aron motawag sa mga espiritu.

Adunay mga pahimangno ang pipila ka mga eksperto kabahin sa pagduwa niini sama sa dili pagbugal-bugal sa gitawag nga espiritu, lig-on gyud nga pagsalig sa Diyos, di paghagit sa mga espiritu ug uban pa.

Si Binghay nagkanayon nga dili na kini bag-o, apan alang sa simbahan kini nagpakita lang nga kuwang sa spiritual activities ang kabataan ilabi na ang relasyon nila ngadto sa Ginoo.

“Kasagaran niini kadtong mga tawo nga dili motuo og Ginoo. Naa puy uban nga bisan og mga binunyagan apan kuwang sa pagtuo ug walay ampo-ampo,” matud pa ni Msgr. Binghay sa Banat News.

Giklaro hinuon ni Binghay nga ang simbahan dili pa makaingon nga kini tinuoray nga na-posses tungod kay posibleng ang hinungdan niini may suliran ang mga nalambigit.

“Dili sad ‘ta makaingon dayun nga spiritual, kay pwede man sad nga psychological ra ni or kung wala bay mga suliran sa pangutok kining mga tawhana,” sigun pa ni Binghay.

Samtang wala pay klarong eksplinasyon niini, si Binghay mipahimangno sa publiko nga dili magtiaw-tiaw niini.

“Di ta magtiaw-tiaw anang mga butanga ilabi na kung espiritu ang atong hisgutan kay kuyaw kung sakyan kita sa yawa,” dugang pa ni Binghay.  - BANAT NEWS