Artsidiyosisis sa Sugbu mipasidungog sa tri-media

CEBU, Philippines - Gipahigayon kagabii sa Archdiocese sa Sugbu ang ika-15 ka tuig Cebu Archdiocesan Mass Media Awards (CAMMA) diha sa SM Cinema 1 agi og pag-ila sa mga maayong kontribusyon sa mga sakop sa media sa katilingban.

Ang paghatag og pasidungog sa nagkadaiyang media personalities ug media outlets himuon matag duha ka tuig sa Archdiocese sa Sugbu nga tumong nga mahatagan og pasidunggog ang mga sakop sa tri-media nga mipakita og talagsaong abilidad sa paghatag sa impormasyon.

Gawas pa niini magsilbe ang maong awarding rites aron pagpakita sa pagbinayloay og nindot nga relasyon ug suporta tali sa Simbahan ug sa Cebu Media.

Nakita sa simbahan nga sama kanila, ang media usa usab ka institusyon nga may tumong nga mohatud og serbisyo sa katawhan.

Lakip sa napiling finalists ang pipila ka mga entries sa Banat News alang sa kategoriyang investigative reporting, special reports, feature writing, editorial, news reports, cartooning ug editorial, ug column writing.

Ang columnist sa Banat News nga si Rico Lucena nominado sa Best in Column writing, si Ma. Eleanor Valeros alang sa Feature Writing ug sila si Brenda Batuto, Rey Pasaporte ug Sanden Anadia sa Best in News Writing.

Sila si Pasaporte, Batuto, Rhea Mae Buoc, Lesley Caminade ug Chester Abadilla nominado usab alang sa Special Reports, Ramesh Rosillo sa Editorial Cartooning.

Ang Banat News mihakot sa nakalabay’ng CAMMA sa Best in Special Reports (investigative reporting)(2007 ug 2009); Best in News Stories (2007 ug 2009), Best in Editorial Cartoons (2007).

Pipila usab ka mga reporter ug columnist sa igsuong mantalaan sa Banat News nga The Freeman ang lakip sa mga finalist kagabii nga atol ning pagsulat sa balita nagpadayon pa ang pagpanghatag sa awards.  - BANAT NEWS