Hostage taking sa presinto

CEBU, Philippines - Napusilan sa kapolisan ang usa ka 26-anyos nga kanhi piniriso sa Cebu City Jail ug gituohang nalisoan sa pangisip nga nang-hostage sa bisitang babaye sa hepe sa kapolisan sa Dumanjug Police Station.

Ang suspetsado mao si Carelio Zafra Balduiza alyas Thaddeo Zafra Camacho, taga barangay Lorega, dakbayan sa Sugbo kinsa unang midemandang buot niining maoy mo-negotiate kaniya ang komentaristang si Bobby Nalzaro sa DySS.

Kini gumikan kay wala siya’y salig sa mga polis sa kahadlok nga siya ‘kuoton’ nga ang pasabot patyon.

Naluwas hinuon ang biktimang si Helen Recuerdo, residente sa barangay Carmen, dakbayan sa Toledo kinsa niadtong higayona mibisita sa opisina sa hepe nga si Senior Inspector Rully Lauron.

Si Lauron mibutyag nga ang suspetsado napriso na kaniadto sa kasong carnapping ug niadtong buwan lang sa Enero niining tuiga nakagawas gikan sa Cebu City Jail.

Sa wala pa mahitabo ang insidente, ang suspetsado mipasangil nga gikulata ug mikatkat sa atop sa kabalayan apan gipakanaog sa usa ka retiradong polis ug gidala unta sa police station, apan tungod kay di kini moreklamo sa mikulata kaniya gidala nalang kini sa retiradong polis aron unta ihatud sa balay niini apan 50 metros gikan sa police station mibalik kini og dagan sa maong buhatan kay giingong nakit-an niini ang mga tawong mikulata kaniya.

Midiretso kini og sulod sa investigation section ug didto nanirado ug namuak sa mga bintana.

Dihang gisuwayan unta sa pag-abli ang pultahan mibahad kining magdunggab sa iyang kaugalingon gamit ang buak nga bintana.

Tunga-tunga sa maong komosyon miabot si Recuerdo ug gitagad ni Lauron ug gipasulod sa iyang opisina.

Dihang mikuha og tubig sa kusina opisina iyahang nabiyaan ibabaw sa iyang lamesa ang iyang kalibre .45 nga pistola nga service firearm diin niya gibilin si Recuerdo.

Mao nalay nakita nilang milabang sa opisina ni Lauron ang suspek ug nanirado.

Didto daghan na kining gipangayong demanda sama sa pagpadala og mediamen ilabi na kang Bobby Nalzaro.

Samtang diha sa sulod nagpunay kini og pabuto sa armas ni Lauron dungan sa pagdayeg sa kanindot sa maong armas.

Dihang nahutdan kini og bala gipugos na sa mga polis og sulod ang opisina ni Lauron apan misulod na diay sa kasilyas ang suspek dala si Recuerdo.

Ang suspek migamit kang Recuerdo nga taming ug mibuak sa bintana ug sa bombilya.

Diha-diha giduot og maayo sa mga polis ang pultahan hangtud nga nakakita og higayon si Lauron pagpusil sa suspek nga naigo diha sa kilid.

Ang biktima nakaangkon og mga samad sa iyang lapa-lapa ug tiil tungod sa buak nga bildo ug bombilya.

Matud pa ni Lauron nga gituohan nilang nalisoan sa pangisip ang suspetsado tungod kay nagsige kini og katawa nga naggunit sa pistola ug nagpunay og hawok ug dayeg sa armas sa pag-ingon: “nindota aning armasa uy.”

Gibutyag ni Lauron nga tulo ka oras ang ilang gihimong negosasyon samtang nagpunay usab og siyagit ang biktima tungod sa kahadlok.

Dihang posasan na unta kini gipaak niini ang kumagko ni Lauron hinungdan sa pagkasamad niini.

Human makontrolar ang suspek ug ang biktima gidala kini ngadto sa Barili District Hospital ug gipatambalan dayon gibalhin ngadto sa Vicente Sotto Memorial Medical Center.

Ang kapolisan misusi pa sa tinuod nga pangalan sa suspek tungod sa pag-usab usab niini.  - BANAT NEWS