Joint oil exploration sa Phl-China
CEBU, Philippines - Gipasalig sa Malacañang kagahapon (Sabado) ang publiko nga patas ang bahin sa kitaon sa joint oil exploration uban sa nasud sa China sa Spratlys.
“It [joint venture] is still in the exploratory stage, we don’t know yet the details of the agreement. But certainly what will be taken into consideration is the parity of the parties and it will also serve our national interest," matud pa ni presidential spokesman Edwin Lacierda sa sibyaanan sa gobiyerno nga dzRB radio.
Matud pa niini nga nagpadayon ang diyalogo sa duha ka habig kalabot niini apan giklaro dayon ni Lacierda nga dili apilon ang mga dapit nga klarong naa sa sulod sa teritoryo sa Pilipinas.
“We know what is ours... Anytime we are going to discuss exploratory talks with other countries we have to bear in mind which is ours and which is disputed," matud pa niini nga gibase niini sa pamahayag ni Foreign Affairs Secretary Albert del Rosario.
Niadtong Biyernes, si Trade Undersecretary Cristino Panlilio giingong namahayag nga misugot na ang Pilipinas nga ang Sino Petroleum Corp. sa China makapahigayon og oil exploration sa Spratlys sa West Philippine Sea (South China Sea) sumala pa sa report sa GMA News.Tv.
Matud pa nga kini naapil sa gipanglantawang 2 bilyones ngadto sa 7 bilyones dolyares nga investment package nga makuha sa mga delegado sa Pilipinas nga mokuyog sa state visit ni President Benigno Aquino III sa China karong sunod semana.
Dugang pa niini nga naglaom ang duha ka nasud nga walay problemang masugatan tungod kay ang Sino Petroleum misanong nga mohimo og oil exploration “under Philippine laws."
Matud pa usab ni Panlilio samang report nga ang mga labaw sa Sino Petroleum makigkita ni Aquino atol sa state visit ug si Energy Secretary Jose Rene Almendras maoy mopirma sa kasabutan sa habig sa Pilipinas. (BANATNEWS)
- Latest
- Trending
