Mipatay sa inahan nagbasol

CEBU, Philippines - Ang Cebu City Prosecutor’s Office dili motugot nga makabutang og piyansa ang 25-anyos nga estudyante sa nursing nga giingong miunay paggulgol sa liog ug milubong sa iyang inahan diha sa ilang balay sa Maria Gochan, barangay Mambaling, dakbayan sa Sugbo.

Human masuta nga dunay probable cause, si Prosecutor Simaco Libata mi-elevate dayon sa kasong parricide ngadto sa korte batok kang Christian Lucky Dalangin.

Si Dalangin sumala pa sa National Bureau of Investigation adunay giluwatang “extra judicial confession” nga siya maoy mipatay sa iyang inahan nga si Rubirosa Tenchavez.

Kagahapon ang NBI nakakuha og commitment order gikan sa sala ni Regional Trial Court (RTC) Judge Eric Menchavez sa Branch 21 sa pagpabalhin kang Dalangin gikan sa karsel sa NBI ngadto sa Cebu City Jail.

Si Dalangin sa interbyu niini sa mga sakop sa media nagkanayon nga nagbasol siya sa iyang gibuhat.

“Siyempre nagbasol, nataymingan lang napungot sad ko and I’m totally black out that time. The damage has been done….after the incident I have this feeling to surrender to the authorities,” matud pa niini.

Sa extra judicial confession ni Dalangin nagkanayon kini nga gipatay niya ang iyang inahan mga ala-una sa kaadlawon niadtong Agosto 23, 2011 (Martes) diha sulod sa ilang balay.

Matud niya nga hubog siya nga miuli sa ilang balay ug nagkaon samtang nagtan-aw og TV nianang tungura.

Ang biktima nanaog ug gikasab-an siya tungod sa nangabuak nga tiles ug gipasanginlang nakaguba sa iyang computer.

Kini gihimakak sa suspek apan padayon ang pangasaba kaniya sa biktima hinungdan nga miadto siya sa kusina ug mikuhag kutsilyo ug gigulgol ang liog sa iyang inahan.

Ug tungod sa kahadlok ug karatol nangayo siya og tabang sa iyang higala nga si Carmelo Echavirria kinsa miadto sa ilang balay. Gibutyag ni Dalangin ngadto kang Echavirria ang tanang nahitabo ug gihangyo niya kining tabangan siya sa pagbalhin sa patay’ng lawas sa iyang inahan ngadto sa kusina.

Sa una niana misanong si Echavirria, apan pagkakita sa patay’ng lawas sa biktima midagan kini.

Mga alas 6:00 sa buntag sa nahisgutang adlaw migawas si Dalangin sa ilang balay ug nangita sa ilang silingan nga gihinganlan og “Randy” ug iyaha kining gisugo sa paglungag sa ilang stock room sulod sa ilang balay nga iyang gipasumangil nga himuong septic tank.

Ang lungag nga gihimo ni Randy upat lang ka tiil ang giladmon ug sa wala pa niya kini gilubong gikuha niya ang mga alahas niini.

Ang bracelet giprenda ni Dalangin ug nadawat og P26,496.

Matud niya nga miangkon siya sa krimen aron mogaan iyang konsensya.

Kahinumduman nga niadtong Biyernes sa hapon na-recover sa NBI Forensic Team ang patay’ng lawas ni Tenchavez gikan sa gilubngan niini sulod sa stock room sa ilang balay.

Ang NBI agent nga si Bernard dela Cruz nagkanayon nga human sa gipahigayong autopsy nasuta nga duna kini samad dinunggaban sa walang bahin sa nawong.

Matud ni dela Cruz nga human sa gibuhat niini ngadto sa iyang inahan si Dalangin nakahuna-huna og palit og gasolina aron sunogon ang ilang balay apan nausab ang huna-huna niini dihang dunay mipikpik sa abaga niini ug nagkanayon nga dili buhaton ang naa sa iyang huna-huna.

 Ang duha ka mga anak sa biktima nga mga maguwang sa suspetsado kinsa nagtrabaho isip mga nurses sa New Zealand ug Singapore gikatakdang moabot karong adlawa.

Si Dalangin nanghinaot nga tugotan siya sa korte nga makatambong sa paglubong sa iyang inahan. (FREEMAN)