Gigulgol, gilubong sa anak

CEBU, Philippines - Naugkat na kagahapon sa hapon gikan sa gilubngan niini sulod sa bodega sa ilang balay ang ginang nga giingong gigulgol sa iyang kaugalingong anak niadtong nakalabay’ng Martes sa kaadlawon.

Ang insidente nahitabo sa ilang balay sa Maria Gochan, barangay Mambaling ug nahibaw-an lang dihang ang usa sa mga igsuon sa biktimang si Ruby Rosa Tenchavez, 53, midangop sa National Bureau of Investigation (NBI) tungod sa pagkahanaw niini.

Ang suspetsado mao ang anak niining kamanghuran nga si Christian Lucky Dalangin kinsa giimbitar sa NBI sa ilang buhatan tungod sa mga alegasyong gipatay niini ang biktima.

Si Edward Villarta, regional director sa NBI sa pakighinabi sa mga tigbalita mibutyag nga si Lucky miangkon pinaagi sa “extra judicial confession” nga siya maoy mipatay sa iyang inahan niadtong Martes sa kaadlawon.

Matud ni Villarta nga giangkon ni Lucky nga gigulgolan niya sa liog ang iyang inahan gamit ang kitchen knife tungod kay sigehan siya og kasaba niini.

Si Villarta miingon nga upat ka tiil lang ang gilubngan sa biktima diha sulod sa bodega duol sa sala sa ilang balay ug giputos og panapton ang nawong niini dihang naugkat sa mga sakop sa NBI forensic investigators.

Ang kutsilyo nga giingong gigamit gitug-an ni Lucky nga iyang gilabay diha sa imburnal atubangan sa ilang balay nga ilaha pang kuhaon isip ebidensya.

Si Lucky gikatakdang pasakaan og kasong parricide karong Lunes.

Gibutyag usab ni Villarta nga ang mga igsuon sa biktima nga sila si Vivian Batayola, Norma Mayubay ug Evelyn Tenchavez maoy mikompirmar nga ang naugkat nga patay’ng lawas iya sa ilang igsuon.

Ang mga NBI Forensic Reaction Team naabot sa lugar mga alas 11:40 kagahapon sa buntag apan wala dayon makasulod sa balay hangtud nga wala maabot ang search warrant gikan sa korte.

Alas 2:55 na sa hapon nasugdan ang pag-ugkat ug gisugdan ang pagkolekta sa mga ebidensya diha sa sulod. Gikatakda usab nga i-autopsy ang biktima.

Sa laing bahin, si Evelyn mibutyag sa mga tigbalita nga niadtong Lunes sa mga alas 10:00 sa buntag mibisita siya sa iyang igsuon ug nianang pagkahapon na sa nahisgutang adlaw siya mibiya kay gipautaw siya niini sa ilang bedsheet.

 Ang bedsheet nga may ginuntingan gibutyag sa biktima nga posibleng binuhatan sa suspek kay nasuko kining wala hatagi og kwarta.

Nianang pagkasunod adlaw (Martes) mibalik siya sa balay sa biktima apan ang suspek maoy nangabli kaniya ug dihang iyang gipangutana asa ang biktima giingong milarga kini ngadto sa Bohol .

Nahibulong siya nga wala siya pasudla sa suspek ug gihagad hinuon siyang mangaon sa atbang nga kan-anan maong wala nalang siya mohinayon ug misanong sa gipanghagad sa pag-umangkon diin siya giingnan nga Biyernes pa mabalik ang biktima.

Gibutyag usab ni Evelyn nga tungod sa pagkabadlongon ni Lucky ug pagkagumon niini sa bisyo sa drugas ug inom gipalayas kini sa biktima kaniadto ug hangtud nga gitugotang makabalik sa ilang balay. Matud pa ni Evelyn nga iyaha nang gipahimangnoan ang igsuon nga di mokumpiyansa sa anak apan gipasaligan siya niining walay dautang mahitabo kaniya sanglit duol ra ang police station ug barangay hall sa ilaha.

Ang police station ug barangay hall sa Mambaling malabay ra og bato gikan sa balay sa mga Tenchavez. (EIM) (BANATNEWS)