Bong Revilla mihatag P1M sa VSMMC

CEBU, Philippines - Personal nga gitunol ni Senator Ramon “Bong” Revilla Jr., ang P1 milyon nga tabang pinansyal alang sa Vicente Sotto Memorial Medical Center (VSMMC) ngadto sa mga kadagkoan sa maong tambalanan kagahapon.

Ang maong tabang maoy katumanan sa   usa ka memorandum of agreement (MOA) alang sa mga kabus nga nagkinahanglan og medical nga tabang ubos sa programa sa VSMMC nga gitawag   nga Kalusogan Ating Pangalagaan (KAP).

Si Revilla mibutyag nga ang Pl milyon niya nga gitagana alang sa Sugbo dako kaayo og ikatabang sa mga kabus nga   pasyente sa maong tambalanan nga maglisud pagbayad sa mga tambal.

Matud pa ni Revilla nga ang maong kwarta gikan sa iyang Priority Development Assistance Fund (PDAF) nga iyang gibahin-bahin alang sa tanang lalawigan sa nasud.

Gani mibutyag usab si REvilla nga sa miaging tuig mihatag usab siya og hinabang sa VSMMC sa susama gihapong katuyoan aron nga makagaan-gaan sa suliran sa mga pasyenteng walay ikapalit og tambal gumikan sa kakabus.

Mipasabot si Revilla nga ang maong hinabang mag-agi sa buhatan ni Governor Gwendolyn Garcia ug Mayor Michael Rama diin ang magkinahanglan og hinabang hatagan nila og guarantee letter. Ang gigahing medical assistance   matag pasyente nagkantidad og P500 diin gihulagway ni Revilla nga dakong kulang apan bisan pa niini iya gayud nga gipaninguha nga makatabang sa katawhan.

Gihulagway usab ni Revilla nga “bawal magkasakit” apan tungod kay dili gyud kalikayang   magkasakit migahin gyud siya og kantidad alang sa mga kabus kinsa gumikan sa kakuwang sa hustong sustansya sa lawas dali kaayong magkasakit. Samtang   si Director Gerardo Aquino sa VSMMC mapasalamaton kaayo sa   hinabang nga gitunol   ni   Senador   Revilla.

Matud pa ni Aquino nga usa ka dakong hagit kanila ang   maong hinabang   kay labing ikadulot nila ngadto sa mga pasyenting kabus ang tawhanong pag-atiman kanila.

Miingon si Aquino nga dili makalimtan sa mga Sugboanon ang maong hinabang ni Senador Revilla. (BANATNEWS)