ALU supak sa hangyo sa mga negosyante

CEBU, Philippines - Dili uyon ang Associated Labor Union-Trade Union Congress of the Philippines (ALU-TUCP) sa hangyo sa mga negosyante nga iuswag og unom ka buwan ang pagtubag sa hangyo nila nga patas-an ang suholan sa mamumuo.

Sumala pa ni Joy Lim , tigpamaba sa ALU-TUCP   nga taas ra kaayo ang unom ka buwan ug dili na mapiog sa mga mamumuo ang grabeng kalisod sa panginabuhi karong panahona.

Kahinumdoman nga gipahigayon ang public hearing sa miaging adlaw diin mihangyo ang business sector nga hatagan sila og unom ka buwan sa pagtuki sa maong hangyo sa labor sector gumikan kay maglisod pa sila sa pagpa-usbaw sa suweldo karong panahona tungod sa epekto   sa krisis sa ekonomiya sa tibuok kalibotan .

“Taas ra kaayo ang six months, ang mga trabahante karong panahona kay maglisod na og kaon katulo sa usa ka adlaw. Unya kasagaran baya ani nila kay mga pamilyado,” suma pa ni Lim.

Nanghinaut si Lim nga makakuha ang labor sector og positibong resulta sa umaabot nga deliberasyon kalabot sa maong isyu nga himoon sa Regional Tripartite Wages and Productivity Board 7.

Miingon si Lim nga namatikdan sa tanang mamumuo ang epekto sa pagsaka sa presyo sa mga palitonon sukad pa niadtong miaging Enero ning tuiga   human mosaka og ka-20 kapin na ang presyo sa mga produkto sa petrolyo.          

Nasayran nga ang ALU-TUCP nangayo og dugang P100 nga suweldo sa suholan gumikan kay mao kini ang motukma sa ilang pagtoon.

Nanghinaut si Lim nga masabtan unta sa mga negosyante ang sitwasyon sa mga trabahante nga maoy nag-antos sa pagpalambo sa ilang mga negosyo. (WC)  (BANATNEWS)