Luigi may bill na para hospital

CEBU, Philippines - Hingpit nang gipalabang ni 6th district Congressman Gabriel Luis “Luigi” Quisumbing ang balaodnon alang sa pagtukod og hospital sa lungsod sa Cordova agi og katumanan sa iyang gisaad ngadto sa nahisgutang lungsod niadtong panahon sa election aron daling maatiman ang mga pasyente sa maong lungsod.

Sumala pa ni Quisumbing nga niadtong Miyerkules, Agosto 24, 2011, iya nang formal nga gisang-at ang House Bill 5200 nga giulohan og " An Act of Establishing A Twenty Five (25)-Bed Hospital In The Municipality of Cordova Province of Cebu."

Matud pa ni Quisumbing nga ang maong hospital pagatawgong Cordova Public Hospital ug ang pundo sa maong proyekto   adto kuhaa sa iyang Priority Development Assistance Fund (PDAF).

Si Quisumbing miingon nga ang Cordova nga usa ka 3rd class municipality nagkinahanglan gyud og hospital nga gituyo niya pagplano aron maatiman ang panglawas sa mga kabus nga mga molupyo sa maong lungsod.

Sigun pa ni Quisumbing nga iyang tinguha nga matukod dayon ang nahisgutang medical facility aron dili na kinahanglang mobiyahe pa og layo ang taga Cordova aron lamang makapahimulos sa basic life-saving equipment ug professional expertise.(WC)  (BANATNEWS)