Abyon nag-emergency landing

CEBU, Philippines - Usa ka 4-seater Cessna plane nga gipanag-iya sa usa ka pribadong kompaniya ang nag-emergency landing pasado alas-11 kagahapon sa buntag diha sa usa ka beach resort sa barangay Agus, dakbayan sa Lapulapu.

Wala hinuoy nakalas sa aksidente gawas lang sa kakulba sa mga sakay niini nga pilotong si Joseph Brint Chiong Jr., ang abyon gipanag-iya sa Mactan Aviation and Technological Center Inc. sa barangay Basak sa dakbayan sa Lapulapu.

Kuyog ni Chiong sila si Capt. Saturnino dela Cruz ug Dito Edrian Rodriguez sa maintenance section. Ang duha giingong mga inspectors sa Civil Aviation Authority nga mo-check unta sa kahanas ni Chiong.

Si Alin Tapusok nga maoy senior line traffic controller sa Civil Aviation Authority of the Philippines sa barangay Mactan mitug-an sa Banat News nga ang maong abyon base sa impormasyong gihatag kanila sa tag-iya nag-testing kini.

Si Tapusok nagkanayon nga alas-10:37 dihang gipahibalo siya sa piloto nga naaberya ang ilang makina ug kinahanglan kining mag-emergency landing.

Human niadto naputol dayon ang ilang komunikasyon ug nasayran na lamang nila nga nag-emergency landing na kini sa kadagatan.

Si Agnes Odang ang tagdumala sa Mactan Aviation and Technological Center Inc. dihang gikuhaan sa Banat News og pamahayag miingon nga atoa na ang mga impormasyon sa CAAP.

Apan si Mark Villanueva sa head tower sa CAAP sa pakighinabi sa Banat News mibutyag nga kutob ra sila sa pagsiguro sa luwas nga flight operations ug ang imbestigasyon sa nahitabo adto na sa ilang ulohang buhatan.  (BANATNEWS)