CEBU, Philippines - Gipangita karon sa kapolisan ang usa ka inahan nga posibleng nagpuyo sa bukirong barangay sa dakbayan sa Sugbu nga mipaanod sa kaluha niini nga mga anak diha sa Butuanon River sa miaging Miyerkules.
Ang mga fetus nga babaye ug lalaki nakit-an sa usa ka Amparo Legaspi Tundag, 55, residente sa maong dapit nga padulong untang molabang sa maong sapa diha sa sitio Dita sa barangay Pulangbato bukirang lugar sa siyudad sa Sugbu ala-una pasado sa hapon.
Sa imbestigasyon ni SPO4 Alex Dacua ug mga kaubanan sa Homicide Section ang duha ka fetus nga daw dili gyud gustong magkabuwag bisan sa ilang gidangatan nagtupad pa dihang nakit-an.
Matud pa ni Tundag sa kapolisan naglutaw sa tubig ang duha nga wala bisan usa ka putos sa lawas hinungdan daling siyang nangayo og tabang.
Ang midwife sa maong barangay nga si Erlinda Gualisa kuyog sa mga opisyales sa barangay maoy mikumpirmar nga kaluha ang fetus babaye ug lalaki ug gibana-banang unom ngadto sa pito na ka buwan.
Ang mga residente sa dapit nagdudang gikan sa bukid ang kaluha ug gipaanod sa sapa sa inahan niini nga gidudahang gituyo og pataktak.
Gisusi karun sa kapulisan kun gipakuha ba gyud gikan sa sabakan sa inahan ang kaluha. Ang kaluha gidala sa San Fernando Funeral Homes alang sa paghatag kanila og tarong nga kapahuwayan.
Sukad niadtong bulan sa Hunyo lima na ka puya ang nakit-ang gipanglabay sa wala pa mailhing mga inahan dinhi sa dakbayan sa Sugbu. (EIM)