Inspeksyon sa mga barko gipaspasan

CEBU, Philippines - Gipaabot nga makompleto na ang gipahigayung re-inspection sa Maritime Industry Authority (MARINA)-7 sa nahabiling tulo ka mga barko sa Island Shipping Corporation karung adlawa lima ka adlaw human sa pagkasunog ug pagkalunod sa usa sa mga barko niini nga M/V Island Fast Craft-1 sa kadagatan sa Larawan siyudad sa Talisay.

Gibutyag ni Atty. Jose “Jojo” Cabatingan, tigpamaba sa MARINA-7 dihang nahinabi sa Banat News nga hangtud kagahapong adlawa duha pa ka barko ang gitugutan nga makabiyahe.

Samtang ang laing barko nga M/V Island Express-2 ang dili pa usab makabalik ang biyahe hangtud dili makurihian ang nakitang ‘minor defects’ niini atol sa inspeksiyon.

Matud ni Cabatingan nga kun masuta nga seaworthy ang nahabiling tulo ka barko atol sa pagtapos sa re-inspection karung adlawa awtomatikong libkason ang suspension order niini.

Gitambagan ni Cabatingan ang mga shipping operators pagtuman gyud sa tanang mga safety measures subay sa lagda sa MARINA aron malikay sa mga aksidente.

Gipasabot ni Cabatingan nga kun dunay mga barko nga malambigit og aksidente sa kadagatan igo lang silang mopatuman sa patakaran sama sa pagsunod sa suspension orders ug re-inspections.

Dugang ni Cabatingan nga nakita nila ang panginahanglan sa publiko sa transportasiyon sa kadagatan maong gipaspasan nila ang inspections.  (BANATNEWS)