Padulong "mosuyop" napusilan

CEBU, Philippines - Samdan sa tuong abaga ug tuong tiil ang usa ka lalaki human kini gipusil sa duha ka wala mailhing lalaking nagsakay og motorsiklo samtang ang biktima giingong padulong mopalit og shabu kagahapon sa kaadlawon diha sa Climaco St., sa barangay Pahina Central siyudad sa Sugbu.

Ang biktima giila sa kapulisan nga mao si Rutchie Escobio Saliente, 28, taga Magsaysay St ., sa barangay Suba kinsa anaa karun sa Cebu City Medical Center (CCMC).

Sumala pa sa biktima ngadto sa kapulisan nga nag-angkas siya sa motorsiklong gimaneho sa iyang higala kay padulong sila mosuyop og shabu diha sa barangay Pasil dihang kalit mihunong ang iyang higala daplin sa karsada.

Wala magdugay miabot ang laing motorsiklo nga gisakyan sa duha ka wala mailhing lalaki ug angkas mipusil kaniya sa makadaghang higayon.

Ang biktima bisan kun samdan na nakadagan pa palayo ug nagpahatud sa mga tawo ngadto sa tambalanan samtang ang duha ka mga gikatahapan miikyas.

Gituohan nga naalaan lang ang biktima o ba kaha aduna kini atraso hinungdan nga gisundan ug gipusil.  (EIM) (BANATNEWS)