Apektado gihapon sa baha ang Guizo Elem. School

CEBU, Philippines - Pabiling apektado ang klase sa mga tinun-an sa Guizo Elementary School sa barangay Guizo sa dakbayan sa Mandaue tungod sa nasinati pagbaha sa ilang mga lawak saringan sa maong tulunghaan.

Kini ang nasayran sa Banat News kang Vivian Solomo nga magtutudlo sa maong tulunghaan dihang nahinabi sa Banat News.

Sa pagkakaron ang pagpahigayon sa ilang klase nag-agad sa kahimtang sa panahon. Kini tungod sa kasinatian nila niadtong bulan sa Enero nga gilunopan ang ilang tunghaan ug nanglutaw ang kagamitan.

Tungod niadto miresponde ang mga rescuers ug nagdala og mga rubber boats aron pagkuha sa mga bata ug mga magtutudlo.

Aron makabawi sa mga adlaw nga walay klase tungod sa pag-ulan magklase sila sa adlaw nga Sabado. Apan usahay dili gihapon kini mahinayon tungod kay dunay mga adlaw’ng Sabado nga mag-uwan sad.            

Sa pagkakaron sagad sa mga butang sa mga magtutudlo sa ground floor kanunay nang andam nga ibalhin sa ikaduhang andana kun mobaha.      Kahinumdoman nga gisugyot ni Mayor Jonas Cortes nga pabiyaan nalang ang maong tunghaan aron maabunohan ug matukoran og laing edipisyo ug ang mga estudyante adto nalang temporaryong paklasehon sa Mandaue City Central School.

Apan wala gyud kini mahitabo sanglit nagkuwang sad ang mga lawak-saringan sa Mandaue City Central School hinungdan nga mibalik lamang sila sa ilang klase sa barangay Guizo.

 Ang Guizo Elementary School adunay gibana-banang kapin sa 1,000 ka mga bata gikan sa Kinder hangtud na sa Grade VI.

Samtang si Ma. Divine Flores sa Accident Control Emergency Response Team (ACERT) nga nahinabi sa Banat News miingon nga 24-oras nilang gi-monitor ang mga barangay sa dakbayan ilabi na kadtong kanunay bahaan.

Kini ang mosunod nga mga barangay ug dapit sa dakbayan nga ilang gibantayan nga kanunay bahaan: dalan A.S. Fortuna sa barangay Banilad, barangay Cabancalan, barangay Guizo, Mantuyong, Maguikay, Paknaan, Subangdaku ug uban pa. (BANAT)