Ex-NPA dako'g matabang sa AFP

CEBU, Philippines - Dako’g ikatabang sa gobiyerno ang kanhi kumander sa New Peoples Army nga mitahan sa lungsod sa Tuburan alang sa pag-edukar sa publiko kabahin sa mga kadaot nga ibunga sa pagrebelde.

Kini ang pamahayag ni 78th Infantry Battalion Executive Officer nga si Maj. Juanito Abecia Jr. atol sa pakighinabi sa Banat News atol sa pagtahan sa maong kanhi rebelde diha kang Mayor Democrito Diamante.

Matud pa ni Abecia nga si Dennis Basera, 21, alyas Kumander Orig ug Kumander James nga kanhi sakop sa CPP-NPA Guerilla Front 18 sa Davao Oriental mahimo nilang gamiton alang sa kampanya batok insurhensiya.

Ang gipasabot ni Abecia mao ang Insurgency Awareness Program sa militar ngadto sa kabukiran nga ang tumong mao ang pag-edukar sa publiko sa mga kadaot ug kadautan sa pagsulod sa mga rebeldeng kalihukan.

Nagtuo si Abecia nga pinaagi sa kasinatian ni Basera sa kabukiran isip usa ka rebelde mas mapadali ang pagpasabot ngadto sa mga tawo sa tinguha sa militar.

Hinuon si Basera wala pa motando sa hangyo sa militar tungod sa seguridad. Si Basera nasulod sa NPA dihang nag-edad pa kini og 16-anyos ug human sa lima ka tuig sa kabukiran nakaamgo siya ug mibalik sa sabakan sa balaod ug mitahan diha sa Tuburan. (BANAT)