CEBU, Philippines - Human ipahibawo sa pamilyang Ouano ug sa kapolisan sa dakbayan sa Mandaue ang P1 milyon nga ganti sa makatug-an sa ngalan sa nagpatay kang Antonio Ouano nga magganoy sa pagkasikop niini daghan nang impormasyon nga nadawat ang kapolisan.
Si Sr. Supt. Noel Gillamac, hepe sa Mandaue City Police Office (MCPO) mibutyag nga daghan na silang nadawat nga impormasyon bahin sa criminal nga mipatay kang Ouano ug mainampingon nila kini karong gisuta.
Matud pa ni Gillamac nga gumikan sa kadako sa maong ganti mahimong daghan kaayong nag-ilog nga makaangkon niining maong kantidad.
Dugang pa ni Gillamac nga nakatabang kaayo ang reward money kay sa pagkakaron daghan na kaayong mihatag og description sa gunman nga miluthang patay kang Ouano.
Sayo niini, si Antonio Ouano Jr. anak sa gibanhigan ug konsehal sa lungsod sa Getafe Bohol mipatawag og press conference sa miaging adlaw aron ipahibawo ang reward money nga P1 milyon alang sa makatabang sa kapolisan pagsikop sa kriminal sa iyang amahan.
Gani matud pa sa anak nga mogahin usab sila og kantidad alang sa mastermind nga mas dako pang kantidad kay sa gitanyag nila alang reward money sa makahatag og impormasyon sa bahin sa mipatay kang Ouano Sr.
Matud ni Gillamac nga kasagaran sa mga ngalang unod sa mga mensahe sa text nga nadawat sa kapolisan sa dakbayan pulos mga nailhan na kaayong gun for hire sa dakbayan sa Mandaue ug dakbayan sa Sugbo. (BANAT)