Way vendors sa Tabunok ang namalhin

CEBU, Philippines - Walay vendors sa Tabunok ang mituman sa kamandoan sa dakbayan sa Talisay nga pabalhinon ngadto sa bag-ong Lagtang Public Market timaan sa pagpakita sa ilang padayong pagsupak niini.

Kagahapon mao unta ang unang adlaw sa pagpabalhin sa mga vendors hangtud na sa Agosto 28 ug sa Agosto 29 hingpit nang sirad-an ang merkado sa Tabunok.

Si Edwin Nierves ang hepe sa Ecological Solid Waste Management maoy gitahasan sa pagdumala sa tulo ka mga dump trucks nga sakyan sa mga vendors sa ilang pagbalhin.

Apan bisag usa ka vendor walay nangakong misakay niini aron mobalhin matud pang Nierves. Nagtapok hinuon ang mga vendors diha sa paradahan ug gipadayon ang ilang pagprotesta.

Si Sherwin Echavez, presidente sa dry goods section nagkanayon nga bisan og pugson sila og pabalhin ngadto sa bag-ong merkado dili gyud sila mobalhin.

Matud niya nga wala silay nakitang legal nga basehan sa siyudad nga tak-opan ang daang merkado.

Si Rosa Abapo, 68-anyos, usa ka fruit vendor diha sa merkado sa Tabunok sulod na sa 40 ka tuig supak usab nga sila pabalhinon ngadto sa bag-ong merkado.

Si Abapo nagkanayon nga posibleng magutman sila ngadto sa bag-ong merkado tungod kay daku ang posibilidad nga hinay ang ilang halin ngadto.

Sa laing bahin, si Bise Mayor Alan Bucao nagkanayon nga walay pugsanay nga mabalhin ang mga vendors ug gipahibalo silang daan sa sayo pa sa tinguha sa siyudad.  - BANAT NEWS