Illegal recruiter gidakop
CEBU, Philippines - Usa ka babayeng gipasanginlang illegal recruiter ang nadakpan sa entrapment operation sa mga sakop sa City Intelligence Branch (CIB) sa Cebu City Police Office (CCPO) sa miaging alas-9 sa gabii diha sa usa ka food chain sa uptown area siyudad sa Sugbu.
Mag-atubang karon og estafa ug illegal recruitment si Johna Posadas, 40, nagpuyo sa barangay Parian ning siyudad human gipasanginlang midawat sa marked money sa kapolisan.
Ang maong kantidad giingong gipangayo ni Posadas aron mahatag na ang passport sa biktimang si Diogecel Gentica, 22, taga Lawaan Tres sa barangay Lawaan sa dakbayan sa Talisay.
Si Gentica mipasangil nga nakahatag na siya og dul-an P1.3 milyon sa suspek human kini mopasalig nga makatrabaho kini sa United Kingdom tungod sa pagsalig nga iyaha kining higala.
Si Chief Inspector Romeo Santander, hepe sa CIB miingon nga base sa records sa Philippine Overseas Employment Administration (POEA) di awtorisadong recruiter si Posadas.
Si Gentica mitug-an sa mga tigbalita nga sukad pa niadtong Disyembre sa miaging tuig hangtud na sa bulan sa Mayo siya nagsugod og hatag sa suspek ug nagkautang-utang ug nakapamrenda og kabtangan aron lang makatrabaho sa UK nga gipasalig sa suspek.
Matud pa niini nga unang gipangayo sa suspek ang P40 mil niadtong Disyembre alang daw sa processing fee aron himuon siyang katabang sa anak ni Posadas didto sa UK apan paglabay og pipila ka semana gipangayoan na usab siya sa suspek og P54 mil aron madali ang pag-release sa iyang mga papeles.
Niadtong Marso gipasaligan siya nga interbyuhon sa British Embassy sa Makati City apan wala gyud kini nahitabo. Gipangayoan usab siya niini og show money ug uban pang mga bayrunon nga miabot sa P1.3 milyon apan wala gihapon siya makalarga.
Kini hinungdan nga midangop na siya sa kapolisan dihang subli kining nangayo og kwarta para daw sa iyang passport.Si Posadas mihimakak sa mga pasangil sa biktima apan miangkong nakasulod siya isip turista sa UK niadtong tuig 2000 hangtud nga mi-eskuyla siya didto ug nakakuha og working visa ug nabalik siya dinhi sa Pilipinas niadtong tuig 2004. - BANAT NEWS
- Latest
- Trending
