NPA kumander mitahan

CEBU, Philippines - Pormal nga gitugyan sa 78th Infantry Battalion ngadto sa kagamhanang lokal sa lungsod sa Tuburan ang mitahang giingong kumander sa New Peoples Army kagahapon.

Ang mitahan mao si Dennis dela Cerna Basera, alyas Komander Orig o Komander James, lumad sa sitio Banahaw sa barangay Sudlon, Mati Davao Oriental ug maoy luyoluyong kumander sa Platoon Guerrilla Front 18 sa New Peoples Army (NPA).  

Si Basera nga gikahinabi sa mga tigbalita mibutyag nga nasulod siya sa NPA sa dihang nag-edad pa siya og 16-anyos pa kini dihang kini nagkuyog-kuyog sa karon usa na ka partilistang Bayan Muna.

Sa tuig 2008 ug 2009 miangkon siyang milusad sila og mga pagpangatake sa mga detachments sa militar ug miangkon nga daghan na siya’g napatay nga sundalo hinungdan nga siya ang nahimong Vice Commander sa Guerrilla Front sa NPA sa Davao Oriental.

Apan gumikan sa mapait nga kasinatian sa kabukiran inubanan sa kagutom, kamingaw sa pamilya ug pagtagotago sa balaod nakadesider siyang mobalik sa gobiyerno niadtong bulan sa Abril ning tuiga.

Diha siya sa Tuburan mitahan gumikan kay anaa magpuyo ang iyang mga kaliwatan nga maoy mikuyog kaniya pagtahan ngadto ni Mayor Democrito “Aljun” Diamante sa lungsod sa Tuburan.

Human sa prosesong gihikay sa 78th IB, matud pa sa executive officer sa maong batalyon nga si Maj. Juanito Abecia Jr. nabalik na sa normal ang kinabuhi ni Basera ug sama sa ubang civilian gawasnon na kini tungod sa amnestiya human makompirmar nila sa Davao ang kalihukan niini.

Samtang ni Mayor Diamante sa iyang bahin nalipay nga misalig si Basera sa iyang kinabuhi ngadto sa lungsod sa Tuburan ug sa iya kini mitahan ug mipasalig sa seguridad niini.

Si Basera mitahan inabagan sa uyoang tanod nga si Ramil Donos sa barangay Marmol sa maong lungsod.

Gihatagan ni Diamante og P10 mil si Basera aron magamit sa iyang pagsugod sa iyang panginabuhian diha sa lungsod.  - BANAT NEWS