Hepe polis nadisgrasya

CEBU, Philippines - Naangol ang hepe sa kapolisan sa Cordova dihang nasungag sa gikasugat nga sakyanan ang motorsiklo nga iyang giluwanan alas-8 pasado ang takna sa miaging gabii sa dalan national sa sitio Suba-Panas, barangay Suba-Basbas, dakbayan sa Lapulapu.

Ang biktima mao si Inspector Noli Sernio, hepe sa kapolisan sa lungsod sa Cordova.

Si PO1 Cesar Gabole, imbestigador sa traffic division sa Lapulapu City Police Office nga nahinabi sa Banat News miingon nga gikan sa barangay Marigondon sa dakbayan sa Lapulapu si Sernio.

Nagdagan kini paingon sa lungsod sa Cordova ug paghidangat sa maong dapit kalit gikasungag ang L-300 nga sakyanan nga gimaneho usab ni Virgilio Lamosao nga gikan sa lungsod sa Cordova.

Matud pa ni Gabole nga tungod sa kakusog sa panagbangga nalamba si Sernio hinungdan sa pagkaangol niini ug gidala sa Mactan Doctors Hospital. Si Lamosao mitahan sa kapolisan human nahitabo ug gikatakdang pasakaan og kaso.  - BANAT NEWS