Simbahan sa Dumanjug ipaayo

CEBU, Philippines - Ipaayo ni Governor Gwendolyn Garcia ang usa sa mga heritage site sa lungsod sa Dumanjug nga mao ang Saint Francis of Assisi Parish Church.

Kini human makita sa gobernadora ang liki sa bongbong sa nahisgutang simbahan   niadtong Huwebes Agosto 18, 2011 uban ni Dumanjug Mayor Nelson Garcia, Msgr. Carlito Puno, Kabilin Host Jojo Berslaes og uban pa.

Gani lakip usab nga ipa-repair sa gobernadora ang bill tower sa nahisgutang simbahan human makita niya nga mibutod na usab ang pipila ka bahin sa nahisgutang kampanaryo.

Gumikan niini gimandoan dayon sa gobernador   si Provincial engineer Eulogio Pelayre sa pag-inspection sa uban pang bahin sa nahisgutang simbahan ug pagsuta sa tanang magasto sa pag-ayo sa maong inprastraktura.

Kahinumdoman nga ubos sa programa sa gobernador, ang pagpreserbar sa kagamhanan sa probinsiya sa Sugbo sa mga heritage site dinhi sa lalawigan maoy usa nga nakapadani sa mga turista nga mibisita sa lalawigan.

Nasayran nga ang simbahan sa Dumanjug   maoy may labing taas nga kampanaryo sa tribuok lalawigan sa Sugbo.  (BANATNEWS)