CEBU, Philippines - Gibuksan ang usa ka semanang kalihokan sa Charter Day Anniversary sa dakbayan sa Mandaue kagahapon sa buntag pinaagi sa parade sa mokabat 5,000 ka mga kawani sa kagamhanan sa maong dakbayan nga gisalmotan sa mga magtutudlo, mga tinun-an, mga barangay opisyal, kabomberohan ug kapolisan sa dakbayan.
Ang pagsaulog sa Charter Day Anniversary karong Agosto 30, 2011 maoy ika-42 ka tuig nga kasumaran niini sukad sa pagkahimong dakbayan sa Mandaue niadtong Agosto 30, 1969.
Usa sa dakong bahin sa pagbukas sa mga kalihokan mao ang pagladlad sa mga lumad nga mga produkto sa kabarangayan sama sa bibingka, tagaktak, budbod masareal ug ingon man ang pagbanhaw og balik.
Sila si Mayor Jonas Cortes ug Bise Mayor Glenn Bercede maoy nangulo sa pagbukas sa maong kalihokan uban sa tanang sakop sa konseho nga naglakip kanila ni Konsehal Diosdado Suico, Konsehal Lollipop Ouano Dizon, Konsehal Demetrio Cortes Jr., Konsehal Elstone Dabon, Konsehal Jimmy Lumapas, Konsehal Editha Cabahug ug uban pa.
Ang nahisgotang parade nagsugod sa alas 7:00 ang takna sa buntag subay sa dalan S/B. Cabahug sa barangay Ibabao ug didto matapos sa Mandaue City Sports Complex. (BANATNEWS)