Misupak sa menteryo nagpakitabang

CEBU, Philippines - Nagpatabang kang Governor Gwendolyn Garcia ang mga opisyal sa mga molupyo sa Beverly Hills ug Beverly Glen ingon man ang Taoist Temple sa Lahug, dakbayan sa Sugbo sa ilang pagsupak nga himoong sementeryo ang Osmeña Shrine sa ilang dapit.

Apan si Garcia mihangyo sa grupo nga maminaw una siya sa tingog sa katawhan kung tinud-anay ba nga ilang gisupak ang plano.

Nunot niini, si kanhi kapitan sa barangay Lahug ug karon konsehal Mary Ann delos Santos mitakda karong Septiyembre 1 og usa ka tigum nga kauban sa gobernador.

Matud pa ni delos Santos nga sa maong higayon ilang masugdan ang panag-alyansa tali sa Kapitolyo nga supakon ang plano.

Gitun-an na karon sa Kapitolyo ang lakang nga himoon mahitungod sa pagdonar ni kanhi mayor, ug karon Kongresista Tomas Osmeña, sa luna sa Osmeña Shrine ngadto sa Evangelical Christian Coalition of Cebu Inc. nga maoy motukod sa sementeryo.

Ang kagamhanan sa lalawigan sa Sugbo maoy tag-iya sa luna ug gidonar ngadto sa dakbayan sa Sugbo ubos sa mga kondisyon diin posibling gilapas ni Osmeña.

Matud pa ni Garcia nga mainampingon silang nagtoon sa lakang nga himoon ug lakip na unya ang pagpaminaw sa apektadong mga molupyo. (BANATNEWS)