Duha ka sunog miulbo kagahapon

CEBU, Philippines - Duha ka sunog miigo sa managlahing lugar dinhi sa dakbayan sa Sugbu kagahapon sa buntag.

Ang unang sunog nahitabo didto sa barangay Apas diin nakan-an sa kayo ang balay nga gipanag-iya ni manlalaban Bienvenido Urbiztondo duol sa Apas Elementary School.

Samtang ang ikaduhang sunog nahitabo didto sa Nivel Hills ug balay ni Vilma Marquez maoy gikaon sa kayo. Si SFO2 Ramiro Amantiad sa Cebu City Fire Department mibutyag sa Banat News nga mikabat og P50 mil   ang kadaot sa balay ni Urbiztondo.

Ang magtiayong Urbiztondo   wala sa ilang balay    sa maong higayon kay nanglarga kini ngadto sa Surigao City.

Matud ni Amantiad nga ilang gisusi ang report nga ang   hinungdan sa maong sunog mao ang wala mapawong nga   bentilador sa usa sa mga lawak sa maong balay.

Samtang sa ikaduhang sunog, giingong didto magsukad ang kayo sa ground floor   sa balay ni Marquez.

Gisusi sa mga bombero ang taho nga ang anak ni Marquez nga may deperensya sa pangisip didto sa ground floor dihang miulbo ang kayo apan nasalbar kini.

Gibana-banang mikabat og P70 mil ang gibiling kadaot sa   balay ni Marquez. (BANATNEWS)