Balay gianod sa sapa

CEBU, Philippines - Usa ka balay nga kilid sa Butuanon River ang naanod sa sapa atol sa pagbunok sa kusog nga uwan diha sa sitio Salvacion barangay Maguikay sa dakbayan sa Mandaue sa milabay’ng hapon.

Swerte hinuong walay mga miyembro sa pamilya ni Edwin Alagape, 30, ang naa sa sulod dihang nahugno ang sala nga bahin sa ilang panimalay nga nahagbong padulong sa sapa ug ang nagpabiling nagbarog mao nalang ang ikaduhang andana niini.

Matud pa ni Alagape mga alas 3:45 sa milabay’ng hapon hinay pa ang ulan sa ilang dapit apan nagbunok na ang uwan sa kabukiran diin nagkutay ang maong sapa.

Ang uwan sa bukid maoy nakapakusog sa awas sa tubig sa Butuanon River hinungdan sa pagkahumok sa riprap diha sa tungod sa iyang panimalay ug nahugno.

Swerte nga wala diha ang iyang duha ka mga nag-abang sa lawak sa iyang panimalay hinungdan nga walay kinabuhi ang nakalas o naangol.

Samtang ang mga opisyales sa barangay daan nang mipahimangno sa 60 ka mga residente daplin sa sapa sa pagpahawa sa maong dapit aron dili kini madisgrasya sama sa nahitabo sa panimalay ni Alagape.

Apan pipila ka mga residente sa maong dapit mipadayag nga naghuwat nalang sila sa ihatag nga relokasyon sa kagamhanang lokal sa dakbayan sa Mandaue diha sa barangay Paknaan.

Nasuta usab sa Banat News nga peligro na usab ang panimalay nila ni Miriam Urot ug Magdalena Velasco nga 16 ka tuig nang nagpuyo sa maong dapit duol sa sapa.

Nasuta sa mga opisyales sa barangay nga duna nay mga liki ang mga estraktura sa ilang mga balay ug bisan unsang oras posibleng mahugno kini, hinungdan nga gitambagan nila silang mopahawa sa ilang mga panimalay alang sa ilang seguridad. (BANATNEWS)