Mga Sugbuanon nangharos sa Nursing exam

CEBU, Philippines - Mga Sugbuanon maoy midominar sa labing uwahing Nursing Licensure Examination human walo sa mga nakapasar ang nasulod sa top 10 base sa resulta Nursing Licensure Examinations niadtong Sabado.

Kini mao sila si fourth placer Patricia Teodoro Pintac sa Cebu Doctor’s University (CDU), Jacob Cabrera Reyes (Cebu Normal University) ug Florence Jill dela Victoria Polina (STI College) isip sixth placer.

Samtang sila si Lowel Andrew Batomalaque (CNU) ug Cherryl Joyce Tan (Velez College) nga nagsawo sa ikawalong dapit; Thea Mae Baronda (Velez College) maoy ninth placer ug 10th placer sila si Deo Robert Castro (CDU) ug Jane Cabatingan (CNU).

Sa interbiyu sa TV Patrol Central Visayas, si Reyes nagkanayon nga wala siya magdahom nga masulod sa top ten, apan mapasalamaton siya sa dakung kalampusan nga iyang nakuha ilabi na ngadto sa iyang tunghaan.

Gawas pa niini, ang Cebu Normal University (CNU) usa usab sa tulo ka tunghaan nga nakahimo og 100% percent passing percentage. Ang CNU adunay 181 passers, gisundan sa West Visayas State University-La Paz nga adunay 161, samtang ang University of the Philippines-Manila adunay 57 ka board passer.

Adunay 37,513 ang mipasar gikan sa 78,135 nga mikuha sa Nursing Board Exam niadtong Hulyo. (BANATNEWS)