P1M ganti gitagana sa mga Ouano

CEBU, Philippines - Human sa usa ka buwan nang wala pay klarong direksyon sa kaso sa pagbanhig patay sa usa sa mga sakop sa pamilyang Ouano sa Mandaue mitanyag sila karon og usa ka P1 milyon nga ganti sa makaila ug makatumbok sa gunman ni Antonio Ouano.

Kagahapong adlawa mipatawag og press conference ang abogadong si Deolito Alvarez, abogado sa anak sa biktima nga si Antonio Ouano Jr., kinsa usa ka konsehal sa lungsod sa Getafe , Bohol uban ni Mandaue City Police Office (MCPO) director Noel Gillamac.

Si Alvarez nagkanayon nga gawas sa reward nga P1 milyon ang pamilyang Ouano maninguhang mohatag og laing ganti alang sa makatug-an si kinsa ang mastermind.

Apan nagdumili si Alvarez kun molabaw pa ba sa usa ka milyon ang ihatag nga reward money alang sa makatug-an sa mastermind apan tumong niini nga madali ang pagkab-ot nila sa hustisya.

Si Antonio Jr. miingon nga matag buntag ilang giampo sa kahitas-an nga adunay tawong mopatim-aw nga makatabang aron mahatagan og hustisya ang iyang amahan.

Kagahapon adlawa misimba ang banay’ng Ouano isip sumad usa ka buwan sa kamatayon sa iyang amahan nga gibanhigan niadtong Hulyo 22 diha sa North Reclamation Area sa dakbayan sa Mandaue sa usa sa duha ka lalaking nagsakay og motorsiklo.

Sa iyang bahin, si Gillamac miangkon nga pinaagi sa reward madasig unya ang katawhan paghatag og impormasyon kabahin sa maong ambush ug posibleng maabot pa sa puntong ang mismong gunman matintal niini ug motug-an si kinsay nisugo kaniya.

Giklaro hinuon ni Gillamac nga kun aduna may mopatim-aw ilaha una kini klaruhon og maayo aron masigurong hustong impormasyon ang ilang makuha aron mataral sa hukmanan ang mga tinuoray nga responsable.

“We don’t want innocent people will be prosecuted,” pagklaro pang Gillamac kabahin sa posibilidad nga adunay mga tawong magkainteres sa kwarta ug magtumo-tumo og tudlo og inosenteng tawo.

Samtang gipasalig hinuon sa mga Ouano nga dili ipaila ang tawong makahatag og lead sa mga awtoridad alang sa ilang seguridad.

 “All information or leads sa gunman will be provided, assisted by the authority,” pasalig pa ni Alvarez.

Giangkon ni Gillamac nga naglisod ang Task Force Ouano sanglit hangtud karun wala pa silay nakuhang saksi nga mohatag og pamahayag tungod sa kahadlok.

Ang kapolisan mitutok sa mga anggulong may kalambigitan sa mga kaso ni Ouano, negosyo ug personal nga kaaway sa biktima.

Dunay gihatag nga hotline ang MCPO alang sa buot mohatag og impormasyon kabahin sa gunman ug mahimong mo-text o kaha tawag dayon kang Sr. Supt. Noel Gillamac sa telepono 0917-303-5172 ug kang Supt. James Goforth 0999-699-3727.

Samtang duna sab gihatag si Antonio Ouano Jr. nga hotline alang niadtong magpanuko sa pagtawag sa kapulisan nga 0915-878-7996, 0947-461-8001, 0923-414-5387 sa National Bureau of Investigation (NBI) hotline 256-3366 ug 253-5631. (BANATNEWS)