TUBIGON, Bohol, Philippines – Samtang nagkarakara ang mga pasahero ug tripulante sa nasunog nga M/V Island Fast Craft 1 gikan sa Bohol niadtong Domingo diha sa kalawran sa dakbayan sa Talisay nahibulong ang mga pasahero kun asa ang kapitan.
Adunay mga pangutana ang ubang mga pasahero ug bisan na ang pipila ka opisyal sa Bohol kun hain na si Lucresio Canedo.
Usa sa mga testigo mialegar nga wala gyud nila kini igkita gawas lang sa chiefmate nga si Abelardo Torrevillas, 57, dihang nagkarakara na ang mga tripolante sa nasunog nga barko pagluwas sa mga pasahero.
Nadugangan ang pagduda human ang mismong mga sakop sa mirespondeng TARSIER (Telephone and Radio System Integrated Emergency Response) sa probinsya sa Bohol tungod kay giingong wala mopakita kanila ang kapitan.
Dali hinuong gihimakak sa Coast Guard ang pagduda sa mga testigo. Sa usa ka interbyu sa telepono, ang Coast Guard officer nga si Fidel Hibaya miklarong diha gyud sa barko si Canedo apan dali kining gipabiya padulong sa Sugbu alang sa imbestigasyon.
Laing testigo usab ang mialegar nga wala gyud nila igkita ang kapitan dihang gipakanaog na ang mga pasahero o ba kaha bisan pagbisita nalang kanila diha sa tambalanan.
Ang mga pasahero mibutyag nga si Torrevillas ray ilang nakit-ang mihimo sa tanan ug mikunsiderar kaniya nga “the last man standing” tungod kay kini maoy katapusang milayat gikan sa barko.
Matud pa nga ang mismong lifejacket niini iyahang gihubo ug gihatag sa usa sa mga pasahero. Ang Coast Guard mibutyag nga posibleng nalumos sa aso si Torevillas.
Siya maoy ikatulong namatay uban sa duha ka pasaherong sila si Necitas Cabreara of Davao City ug Mathea Infiesto, 62 nga taga Clarin, Bohol.
Ang tag-iya sa Island Shipping Corporation nga si Alex Tan atol sa interbyu sa DyDD mipasalig nga ilang atimanon ang gastos pagpahiluna sa tulo ka mga namatay.
Sa paghimo ning balita gimandoan na ni Tan ang iyang abogado nga si Atty. Ben Cabredo pagduso og marine protest sa coastguard karung adlawa. Giklaro usab niyang isolated case lang ang maong panghitabu.
Samtang si Commander Rolando Punzalan sa Cebu Coastguard nagkanayon nga nagpaabot pa sila sa marine protest gikan sa kapitan sa maong barko una pa masugdan ang imbestigasyon sa Special Board of Marine Inquiry (SBMI).
Giklaro usab ni Punzalan sa interbyu sa TV Patrol Central Visayas nga kompleto ang life jackets sa maong barko atol sa inspeksyon sa wala pa kini mobiya sa Bohol .
Kini luyo sa pasangil sa pipila sa mga survivors nga kuwang ang life jackets tungod kay wala sila panghatagi sa mga crew.
Samtang giangkon usab ni Punzalan sa maong interbyu nga wala dayon sila makadawat og pahibalo gikan sa maong barko sa nahitabo kanila maong wala dayon sila makapadala og barko sa nahitaboan.
Matud ni Punzalan sa inisyal nga impormasiyon gikan sa pipila ka mga tripulante, electrical fire gikan sa engine room ang hinungdan apan sutaon pa unya kini atol sa pormal nga imbestigasyon.
Samtang gibutyag ni Engr. Mardon Martin ang Safety Engineer sa Maritime Industry Authority (MARINA)-7 nagpaabot nalang og desisyon nga ipakanaug sa crisis committee sa Marina-Manila.
Gimando kagahapon ni Department of Transportation and Communications (DOTC) Secretary Manuel Roxas II ngadto sa Maritime Industry Authority (MARINA) nga i-ground ang nahibiling lima ka barko sa Island Express Shipping.
“At this point, public safety is our primordial concern. I will not allow shipping companies to take chances with the lives of the passengers. DOTC will ensure that whenever a passenger steps on a ship, he can be certain that ship will have passed all the stringent requirements for safety," matud pa ni Roxas sa news release sa government portal nga gikutlo sa GMA News.Tv.
Matud pa niini nga masigurong luwas sakyan ang mga barkong gi-operate sa Island Express Shipping nga adunay unom ka barko lakip na ang usa ka fast craft ug lima ka roll-on-roll-off (RORO) nga barkong nagbiyahian sa Hagnaya-Sta. Fe ug Cebu-Tubigon. (BANATNEWS)