Namukot napalgang patay

CEBU, Philippines - Patay nang napalgan nga naglutaw sa sapa ang usa ka 45- anyos nga lalaki nga unang nananghid nga mamukot sa usa ka sapa sa sitio Sto. Niño sa barangay Flores lungsod sa Catmon niadtong Domingo sa alas 8:17 sa buntag.

 Ang napalgang patay mao si Wilfredo Bentolan, 45, molupyo sa nahisgutang lugar.

Matud ni PO2 Ben Navales sa Catmon Police dihang nahinabi sa Banat News, subay sa imbestigasyon gikan sa mga kabanay niini niadto pang Sabado nananghid nga molakaw aron mamukot sa sapa dili kaayo layo sa ilang balay.

Apan nahibulong ang mga kabanay nga wala na kini mopauli nianang pagkagabii ug dihang ilang gisusi pagkabuntag nakit-an kini nga wala nay kinabuhi diha sa sapa.

Ang mga kabanay misalikway sa posibilidad nga dunay foul play sa kamatayon niini tungod kay nagtuo gyud kining nalumos si Bentolan human atakeha sa usa ka balatian. Matud pa kaniadto pa nila nabatyaging magmulo kini sa kasakit sa dughan.( /EIM) (BANATNEWS)