Kampanya batok human trafficking pakusgan

CEBU, Philippines - Si Governor Gwendolyn Garcia   mipasalig nga labi pa niyang palapdan ang kampanya batok sa human trafficking dinhi sa lalawigan sa Sugbo.

 Kini pinaagi sa pagtukod og kaugalingong Anti-Human Trafficking Task Force sa matag usa sa 44 ka mga lungsod ug 6 ka mga component city sa probinsiya sa Sugbo.

Matud pa ni Sr. Insp. Catalina Diotay, ang pangulo sa Women's and Children's Protection Disk ( WCPD) sa Cebu Provincial Police Office nga ang mga mayor sa probinsiya misanong sa hagit nga gipalanog   sa gobernador nga gokuron gyud ang mga nagpasiugda og mga kalihukan sama sa cybersex nga nagpahimulos ug nagpasipala sa lawas sa mga kababayen-an ug mga kabataan.

Sigun pa ni Diotay nga gawas sa mga mayor, ang mga kapolisan   sa   kalungsoran moabag usab sa maong kampanya sa kagamhanan sa lalawigan.

Gani sa matag lungsod ug siyudad, ang hepe sa kapolisan maoy mangulo sa Local Anti-Human Trafficking Task Force (LAHTTF) ug mao usab kini ang mohatag og report ngadto sa CPPO ug sa buhatan sa gobernadora sa higayon nga may madiskitahan kining cyberpornography ug uban pang mga pagpangabuso sa lawas sa kababayen-an ug kabataan.

Matud pa ni Diotay nga namugna ang LAHTTF sa kalungsoran gumikan usab sa sub-sob nga kampanya ni Governor Garcia sa pakiggubat batok sa human trafficking ug cybersex dinhi sa Sugbo. (/WC)  (BANATNEWS)