Mga negosyante gidasig pagsulbad sa baha

CEBU, Philippines - Dako og matampo sa pagsulbad sa problema sa pagbaha sa kabarangayan sa dakbayan sa Mandaue ang mga magpapatigayon pinaagi sa pagbutang og tukma nga mga kanal sa tukoron nila nga mga negosyo.

Si Engineer Florentino Nimor, pangulo sa city planning development office (CPDO) sa Mandaue nga nahinabi sa mga tigbalita mibutyag nga dakong suliran sa pagsulbad sa problema sa pagbaha kun   moliko ngadto sa laing lugar ang natural nga agianan sa tubig.

Kini ilabi na kun magdumili ang mga tag-iya sa establisamento sa paghatag og higayon nga adto molagbas sa ilang lugar alang sa tul-id nga pagdagayday sa tubig.

Si Marlene Bedia, executive director sa Mandaue City Chamber of Commerce and Industry (MCCCI) nga nahinabi sa mga tigbalita iyang mipadayag nga adunay panagtigom nga ilang ipatawag aron pagtuki niini.

Gitataw niya nga ang dakbayan sa Mandaue maoy usa sa mga dapit sa Sugbo nga sentro sa natad sa patigayon maoy hinungdan nga dili maayo kun kanunay lamang masinati ang pagbaha.

Kini ang hinungdan nga kun gikanahanglan ang ilang tabang dili usab sila magmakuli sa pagsanong niini sa kagamhanan.  - BANAT NEWS