CEBU, Philippines - Hingpit nang ipatuman sa lungsod sa Medillen sugod karong adlawa ang ordinansa nga “no segregation, no collection of garbage policy”.
Gipahibawo kini sa chairman sa Solid Waste Committee sa Medillen nga si Randy Perez human aprobahi ni Mayor Ricky Ramirez ug sa mga sakop sa konseho sa lungsod ang ordinansa kalabot niini.
Matud ni Perez atol sa interview sa Bantay Radyo nga nalangay ang pagpatuan nila sa maong ordinansa tungod usab sa daghang hangyo sa mga molupyo sa maong lugar pag-angan angan lang una sa implementasyon niini.
Apan matud ni Perez nga human sa gihatag nilang lugway nga panahon, ila nang ipatumang higpit ang balaod.
Nunot niini gipahibawo ni Perez ang mga molupyo sa lungsod sa mga schedule sa paglabay sa ilang mga basura sugod ugma.
Ang taga barangay Kawit, Mahawak, Daanlungsod ug Antipolo ang schedule sa paglabay sa malata nga basura mao ang adlawng Domingo, Martes ug Huwebes, samtang ang schedule sa di malata nga basura kolektahon sa matag adlawng Sabado, Lunes ug Biyernes.
Samtang ang ubang mga barangay sa lungsod, Domingo, Lunes ug Biyernes kolektahon ang basurang malata.
Samtang ang di malata nga basura kolektahon sa adlawng Martes, Huwebes ug Sabado.
Giklaro ni Perez nga kadtong di motuman sa maong pahibawo ug di mobahig sa ilang basura nga malata ug di malata, dili kolektahon ang ilang mga basura.
Tipik ug kabahin kini matud ni Perez sa pag-amoma sa kinaiyahan sa lungsod sa Medillen. - BANAT NEWS