VMLP gihataga'g P2M

CEBU, Philippines - Laing P2 milyones ang gihatag ni Governor Gwendolyn Garcia ngadto sa Vice Mayors League of the Philippines (VMLP) Cebu chapter alang sa   mga proyekto   sa lega.

Kini ang ika-duhang higayon nga mihatag ang gobernador ngadto sa   maong grupo niining tuiga.

Matud pa ni Garcia nga dili siya makabalibad sa hangyo sa kahugpongan sa mga bise mayor sa laing financial assistance alang sa mga proyekto niini sanglit nakita man usab niya   nga dali ra usab kaayong nahuman ang mga proyekto nga gipatuman sa mga bise mayor.

Una nang mihatag   ang gobernador og P2 milyones sa grupo sa milabayng tuig nga maoy gigasto nila sa paghimo og mga lawak saringan sa kalungsoran karong tuiga.

Samtang si Vice Mayor Arlene Zambo sa syudad sa Toledo kinsa maoy president sa VMLP-Cebu chapter mapasalamaton usab kaayo sa hinabang sa gobernador nga gi- anunsyo niini atol sa ilang tigum didto sa Cordova.

Dugang usab ni Zambo nga ila na usab kining ipatukod og tulunghaan nga ipabunot ngadto sa mga membro niini nga wala pa maka-angkon sa school class room building gikan sa ilang kahugpongan.

Nasayran nga sa milabayng tuig, 4 ka mga school building nga may tag-duha ka classroom ang gihatag sa lega sa mga bise mayor ngadto sa mga kalungsoran ug niining tuiga laing walo na usab ka classroom ang matukod sa VMLP Cebu Chapter tungod sa hinabang sa gobernadora.  - BANAT NEWS