Health emergency system tukoron

CEBU, Philippines - Si Governor Gwendolyn Garcia ug   si Medical Director Gerardo Aquino sa Vicente Sotto Memorial Medical   Center (VSMMC) naglaraw sa pagmugna og one province-wide health emergency system (OPHES).

Kini human makita ang kamahinungdanon sa hiniusang paningkamot nga matubag   ang medical nga panginahanglan sa higayon nga may motumaw nga mga dagkong mga trahedya dinhi sa lalawigan sa Sugbo.

Matud pa ni Dr. Aquino nga nakita sa gobernadora nga gikinahanglan kaayo ang pagtamod og usa ka sistema sa daling pag-atiman sa mga pasyente ilabina   na kun daghan ang mabiktima sa trahedya.

Sa maong sistema gikinahanglan ang koordinasyon sa VSMMC ug sa mga hospital sa kalungsoran nga posibleng unang   sangkoan  sa mga biktima.

Gitataw ni Dr. Aquino nga ang tumong sa maong lakang mao nga maatiman nang daan ang mga pasyente didto pa mismo sa lugar nga nahitaboan aron ang hospital nga padad-an unya   niini nga makahibalo nang daan sa kahimtang sa pasyente ug dali na lamang unya kining matambalan.

Hinuon giklaro niya nga nagkinahanglan pa   nga plansahon nila ang kasabutan ug   ang sistema uban   sa gobernador aron mapatuman dayon kini sa labing daling panahon samtang wala pay dugang dagko nga trahedya sa kalungsoran   human    sa nahitabo sa lungsod sa Barili.  - BANAT NEWS