Mirespondeng polis nadunggaban

CEBU, Philippines - Nakabaton og samad sa kamot ang usa ka sakop sa kapolisan sa dakbayan sa Lapulapu human gidunggab og gunting sa barberong iyaha untang dakpon human manunggab og silingan diha sa barangay Bankal, dakbayan sa Lapulapu sa miaging kaadlawon.

Ang naangol mao si PO1 Franklin Bolaquia sa Homicide Section sa kapolisan sa maong dakbayan kinsa gidala sa tambalanan tungod sa samad sa kamot.

Ang suspek nga misukol mao si Joseph Garay, 25, barbero ug nagpuyo sa sitio Tigkahon sa barangay Bankal sa maong dakbayan.

Si PO2 John Carlo Jocotan sa Homicide Section sa kapolisan sa maong dakbayan miingon nga unang gidunggab sa suspetsado si Lemuel Montecillo.

Matud pa ni Jocotan nga adunay panagbangi si Montecillo ug Garay hinungdan nga dihang nagkatagbo kini sa maong dapit mitumaw na usab ang panaglalis ug misangpot sa pagpanunggab gamit ang gunting.

Si Montecillo nadunggaban sa bukobuko ug daling gibiyaan sa suspek. Si Montecillo gidala sa Lapulapu City District Hospital ug gibalhin kini sa Vicente Sotto Memorial Medical Center sa dakbayan sa Sugbo.

Si Balaquia kauban ang ubang polis mitubag sa maong alarma ug gisundan ang suspek diha sa sitio Poblacion sa barangay Mactan ug dihang ilang naabtan ilaha kining giawhag sa pagtahan.

Apan miibot hinuon kini og gunting ug gidunggab si Bolaquia ug suwerteng nakalihay apan naabtan ang kamot niini, dihang gitionan og armas ang suspek una pa kini mitahan.

Madoble na hinuon karon ang kasong atubangon sa suspek tungod sa pagdunggab sa polis ug kang Garay. (BANATNEWS)