Trabahante nakakawat og P50 mil cash

CEBU, Philippines - Nasakiyo sa duha ka suspetsadong kawatan ang P50 mil cash ug mga baligya sa tindahang gitrabahoan nila kanhi didto sa merkado publiko sa lungsod sa Consolacion sa miaging gabii.

Ang biktima   mao si Alladin Dalangin, kinsa maoy tag-iya sa tindahan nga gikawatan, samtang ang mga suspetsado mao ang duha ka kanhi niya trabahante nga iya nang gitangtang sa trabaho nga mao sila si Gel Dayday, ug Raymond Sepe nga pulos hingkod ang panuigon ug pulos taga barangay Tabla sa lungsod sa Liloan.

Si PO1 Rey Adriaque sa kapolisan sa maong lungsod miingon nga sa alas 12:00 pasado sa miaging tungang gabii misulod sa tindahan    sa biktima ang maong mga suspetsado sa pananghid nga gisugo sila sa ilang amo nga pakuhaon og mga sinakong bugas.

Sila si Ebenzer Rojas ug Jose Ylaya kinsa mga guwardiya sa merkado miingon nga yano ra kaayong nakasulod ang duha ka suspek sa tindahan sa biktima.

Apan matud pa ni PO1 Adriaque nga dihang gitawagan sa mga guwardiya ang biktima   gipanghimakak niini nga   may gisugo siyang mga tawo   sa pagpahakot og mga baligya sa tindahan sa maong oras sa kagabhion busa mihiwasa kini sa kalagot.

Nagdali kini sa pag-adto sa iyang tindahan    ug didto niya hisayri nga nasakiyo na ang iyang halin nga P50 mil cash, duha ka sakong bugas, ug sagol-sagol nga grocery items.

Si Dalangin mibutyag sa kapolisan nga ang gigamit sa maong mga suspetsado mao ang duplicate sa yawe   sa iyang tindahan.

Gipangita  na sa kapolisan karon ang mga suspetsado. (BANATNEWS)