Pasahero nga may shabu tiklo

CEBU, Philippines - Nasikop sa kapolisan    ang usa ka pasahero sa habal-habal kinsa nasakpang nagluklok og shabu ug kahimanan sa paggamit niini atol sa usa ka check point didto sa Upper Casili, dakbayan sa Mandaue sa miaging gabii.

Ang suspetsado mao si Argie Gonzaga, 27 , ulitawo nga taga barangay Nangka sa lungsod sa Consolacion ug ang nagdakop kaniya mao ang team nila ni PO3 Gregorio Sabal, PO2 Benjie Abaton ug PO1 Arvin Set Felecio sa kapolisan sa Presinto 6 sa Canduman Police Station sa dakbayan sa Mandaue.

Si PO1 Tirso Plania sa kapolisan sa nahisgotang presinto mibutyag sa Banat News nga sa gipahigayon nilang checkpoint naandan na nila ang pagpangrikisa sa matag tawo ug   motorista nga moagi sa dapit diin gipahiluna ang check point.

Unya ang habal-habal nga giluwanan ni Gonzaga wala makaipsot niini, ug dihang girikisa nila ang lawas   sa suspetsado nga luwan sa maong motorsiklo, nadiskobrehan nila ang duha ka paketeng   shabu sa bulsa niini.

Gawas sa shabu, ang kahimanan sa paggamit niini nasakmit usab sa kapolisan .

Samtang gitanggong na sa prisohan ang suspetsado, gihikay na usab ang tukmang kaso nga isang-at batok kaniya. (BANATNEWS)