Libreng sakay padung lagtang gisugyot

CEBU, Philippines - Aron makadani og mga tawong mamalit sa bag-ong merkado publiko sa dakbayan sa Talisay misugyot si Bise Mayor Alan Bucao og libreng sakay sa mga kostumer.

Gibutyag ni Bucao nga mao ni ang iyang sugyot sa ilang panagtigom ni Mayor Socrates Fernandez  apan nagpaabot pa siya sa tubag sa mayor.

Matud pa ni Bucao nga aduna silay mga nadawat nga mga report nga maningil og dobleng pletihan ang mga drayber sa traysikol sa gustong mangompra sa Lagtang.

Sa pagkakaron ang mga traysikol anha lang kutob sa merkado sa Tabunok ug kung moadto kini ngadto sa Lagtang laing pletihan na usab ang ilang pangayuon.

Apan kini dakong kalapasan sa re-rerouting nga gipatuman sa siyudad nga ang katuyoan mao ang paghatag og transportasyon sa publiko nga mangompra sa bag-ong merkado publiko sa Lagtang.

Ug kun layo ang biyahe padulong sa Lagtang dugang piso ang pletihan gikan sa P8 mahimo nang P9.

Apan nasayran nga daghang mga traysikol ang padayong nagmagahi sa pagsunod niini ug padayong moinsister nga basta padulong sa Lagtang doble gyud ang pletihan. Wala pa hinuoy mitiyabaw o pormal nga misang-at og reklamo sa wala pagsunod sa kamandoan sa siyudad sa mga drayber.

Karong Agosto 29, 2011 ang gikatakdang adlaw sa pagbukas sa bag-ong merkado diha sa Lagtang ug balhinon na usab ang terminal sa mga traysikol sa maong merkado.

Kun kini mapatuman dili na mahimong makapangayo og doble ang mga drayber gawas nalang sa dugang piso sa minimum kung layo gyud ang ilang destinasyon sa siyudad. Karong wala pa mahingpit ang operasyon, napanglantawan ni Bucao nga dako og matabang ang libreng sakay aron madasig ang publiko nga mangompra sa bag-ong merkado. (BANATNEWS)