Sakop sa Crips gibirahan patay

CEBU, Philippines - Patay ang usa ka 18-anyos nga lalaking giingong sakop sa Crips gang human kini pusila kagahapon sa kaadlawon diha sa merkado publiko sa barangay Tabunok, dakbayan sa Talisay.

Ang biktima giila sa mga polis nga si Kerin “Kevin” Gabaca, residente sa Santo Niño, Greenfield, barangay Inayawan, dakbayan sa Sugbo ang nakaangkon og samad pinusilan sa tuong abaga ug tuong bahin sa tiyan ang daling gidala ngadto sa Talisay City District Hospital apan wala na kini makaabot nga buhi diha sa maong tambalanan.

Gipangita karon sa kapolisan ang usa ka batan-ong naila lang sa pangalan nga “Bryan” kinsa maoy gitumbok nga mipusil sa biktima kinsa dali usab nga miikyas.

Sa imbestigasyon sa kapolisan, kataposang nakit-an uban sa usa ka “Kempee” si Gabaca.

Na-recover sa mga polis diha sa lugar nga nahitaboan ang usa ka slug ug tulo ka mga parte sa na-deformed nga bala.

Si SPO1 Mikie Espina kinsa usa sa miresponde sa hitabo nga nahinabi sa Banat News kagahapon nagkanayon nga usa sa motibo sa insidente mao ang atraso.

Giingong si Gabaca sakop sa Crips gang ug gipasanginlang mikulata kaniadto sa suspetsado nga gituohang sakop sa kaatbang nga gang.

Si Espina midugang nga sa wala pa mapusili ang biktima mihangyo pa kini sa suspetsado nga dili lang siya patyon. Ang suspetsado padayon pang gipangita karon sa kapolisan. (BANATNEWS)