Opisyales sa dakbayan naalarma sa dengue

CEBU, Philippines - Naalarma na ang mga opisyal sa dakbayan sa Sugbo gumikan sa mga kaso sa sakit nga dengue nga ilang gikabalak-ang mosaka karong mga panahona nga ting-ulan nga nasinati sukad pa niadtong milabay’ng semana.

Nunot sa maong sitwasyon ang konseho sa siyudad miawhag sa mga opisyal sa Cebu City Health nga gipangulohan ni Stella Ygoña nga mohatag og situational report kabahin sa dengue atol sa regular nga sesyon karong Miyerkules sa konseho. 

Ang konseho nakadawat og report nga tungod sa sunod-sunod nga bundak sa uwan migrabe ang sitwasyon sa kaso sa dengue sa ubang parte sa nasud ug makaalarma na kini.

Hinuon ang kaso sa dengue sa siyudad karon ubos kompara sa milabay’ng tuig.

Base sa record sa Cebu City Health Department nga sukad niadtong buwan sa Enero niining tuiga dunay 757 ka kaso sa dengue ug walo niini ang namatay.

Apan si assistant city epidemiologist Durinda Macasucol nagkanayon nga ang nahisgutang gidaghanon mas ubos kun itandi sa milabay’ng tuig nga dunay 930 ka kaso sa dengue ug pito niini ang namatay. Ang Department of Health ang nanawagan sa mga opisyal sa mga lokal nga kagamhanan ug sa publiko nga ipadayon ang clean-up campaign batok sa dengue ilabi na ngadto sa lugar nga dunay taas nga kaso sa dengue.

Sa nationwide nga record gikan sa buwan sa Enero hangtud sa Agosto niining tuiga dunay 45,333 nga kaso sa dengue ang natala hinuon ubos kini kompara sa milabay’ng tuig nga dunay natalang 68,168 sa samang mga buwan. Niining tuiga 267 na ang namatay samtang 539 ang namatay sa milabay’ng tuig sa susamang mga buwan.

Si Health Secretary Enrique Ona nanawagan sa publiko nga ipadayon ang mga kampanya sa mga komunidad sa pagpuhag sa mga itloganan ug pundohan sa mga lamok. (BANATNEWS)