'Kawatan' gipatay

CEBU, Philippines - Patay nang napalgan ang usa ka gipasanginlang kawatan nga giingong adunay deperensiya sa pangisip human kini gipusil ug gituohang gidunggab usab pasado alas-6 sa miaging adlaw sa bukirang bahin sa sitio Bulacoa barangay Toong ning dakbayan.

Ang biktima nailhan nga si Charlie Gabutay, 29, nakaangkon og samad pinusilan sa iyang kilid ug tiil nga milapos sa pikas.

Sa inisyal nga imbestigasyon sa kapolisan nasayran nga ang biktima napalgan nalang nga nagbuy-od sulod sa iyang payag pipila ka metros gikan sa panimalay sa iyang inahan.

Nasayran sa kapolisan gikan sa usa ka Tita Abastas nga nakadungog kini og lima ka buto sa armas nianang pasado alas-9 sa Huwebes sa gabii dapit sa panimalay sa biktima.

Nianang pagkabuntag pasado alas-5 giadto ni Abastas ang panimalay sa inahan sa biktima ug gitug-anan kabahin sa nadunggang buto gikan sa payag sa biktima.

Ang inahan sa biktima nga si Ursula daling misubay sa panimalay sa anak duha iyaha nalang kining napalgang wala nay kinabuhi.

Sa pakisusi sa kapolisan nasayran nga ang namatyan sa biktima mao ang pagkahurot sa iyang dugo.

Nakita usab sa kapolisan nga adunay dakong samad nga daw nababha sa walang bahin sa kilid ang biktima gawas niini aduna usab samad pinusilan sa iyang tiil nga milapos sa pikas nga bahin.

Samtang nakakuha usab ang kapolisan og usa ka kabhang sa wala pa matinong kalibre sa armas.

Matud pa sa inahan sa biktima nga adunay sakit sa pangisip ang iyang anak gani ang uban nilang kasilinganan mipasangil sa biktima nga usa ka kawatan sa ilang dapit.

Samtang si SPO3 Rey Cuyos mibutyag nga posibleng adunay daghang naglagot sa biktima tungod sa giingong pagka-kawatan niini.

Midugang si Cuyos nga nagsubay pa karun sila sa hinungdan sa kamatayon sa biktima ug si kinsa ang responsable niini.(EIM) (BANATNEWS)