Call Center nakatabang kaayo

CEBU, Philippines - Ang paglambo sa mga industriya sa konstraksyon ug call center sa Central Visayas nakatabang og dako sa pagsulbad sa unemployment problem dinhi sa rehiyon.

Si Regional Director Exequiel Sarcauga, sa Department of Labor & Employment (DOLE)-7 miingon nga ang rehiyon 7 nakakab-ot sa kinaminusang gidaghanon sa walay trabaho sa kasaysayan niini nga 6.2 porsiyento.

Ang duha ka industriya sa konstraksyon ug call center maoy nagluwas   sa suliran sa pagpangempleyo sa rehiyon, matud pa ni Sarcauga.

Kaliboan ang nakatrabaho   ning maong mga industriya busa gikinahanglan kaayo sa gobyerno nga mangimbitar og dugang mamuhonan og negosyo dinhi sa rehiyon aron masalbar ang mga molupyo nga walay  mga panginabuhi.

Miingon usab si Sarcauga nga ang ilang buhatan wala magpalandong nga ang pag-ubos sa credit rating sa US, ang kagubot sa London ug Syria adunay dakong epekto dinhi sa rehiyon.

Kini tungod kay nakabaraw kini sa mga kwalipikado untang mga Pilipino nga angay makatrabaho didto sa maong mga nasud.

Sukad sa tuig 2008, dyutay ra nga mga mamumuong Pilipino   nga   gipadala ngadto sa Europa ug Estados Unidos, sumala ni Sarcauga.

Samtang, ang Philippine Overseas Employment Administration sa Central Visayas (POEA)-7 nag-monitor usab sa mga Pilipinong marino nga nagtrabaho sa mga yate didto sa Europa, matud pa ni Regional Director Evelia Durato sa POEA7. (BANATNEWS)