Santos masikop na

CEBU, Philippines - Masaligon karon ang kapolisan sa lalawigan sa Sugbo nga dali na unyang madakpan si Bella Ruby Santos, ang nagtagotagong suspetsado sa pagdagit ug pagpatay kang Ella Joy Pique.

Kini tungod sa pagtanyag ni Governor Gwendolyn Garcia og dakong ganti alang sa mga tawo nga mohatag og kasayuran sa kapolisan sa lugar nga gitagoan ni Santos karon.

Matud pa ni Cebu Provincial Police Office director, Sr. Supt. Patrocenio Comendador nga dako kaayo og ikatabang ang gihatag nga ganti alang sa mga tawo nga makatabang sa pagdakop ni Santos.

Sa iyang bahin si Governor Garcia miingon nga igo ra niyang gihatagan og gibug-aton ang iyang programa nga tipster program nga mohatag og ganti ang mga tawo nga motabang sa kapolisan sa pagsumpo sa nagkadaiyang krimen dinhi sa lalawigan sa Sugbo.

Matud sa gobernador nga gusto siya nga mataral sa hukmanan si Santos ug ang iyang langyaw nga hinigugma nga maoy natumbok nga suspetsado sa pagpatay kang Pique.

 Matud pa sa gobernador nga iya unyang ipatawag sila si PRO7 Director Ager Ontog ug CPPO Director Comendador aron ilang tukion ang kaso ni Bella Ruby Santos.

Ang gobernador wala motug-an kun pila gyud ang iyang ihatag nga ganti apan iyang gipasalig nga dako gyud ang maong kantidad nga itunol sa kagamhanan ngadto sa mga tawo nga makatabang sa kapolisan sa dali nga pagdakop kang Santos. (BANATNEWS)