Sikyu gi-heart attack patay

CEBU, Philippines - Patay nang napalgan ang usa ka gwardiya nga gituohang gi-atake sa sakit sa kasingkasing samtang nagbantay   sa usa ka establisamento didto sa Sityo Bahac barangay Yati lungsod sa Liloan sa milabay’ng gabii.

Ang biktima mao si Edgardo Rances, 46, minyo, nga taga sitio Lumbang, barangay Pulpogan, lungsod sa Consolacion ug gwardiya sa Gesa Security Agency nga nadistino sa Aqua Pac drinking water nga nagbasi sa maong lugar.

Si PO2 Routchil Jugalbot sa Liloan Police Station mibutyag sa Banat News nga ang nakadiskobre sa patay’ng lawas sa biktima mao    ang guwardiya nga mirelibo kaniya nga nailhan lang sa ngalang Wenceslao.             

Nasayran sa kapolisan   nga si Rances naghigda na sa bangko sa gawas sa maong establisamento nga wala na magginhawa dihang nakit-an sa mirelibo niining gwardiya.

Dali kining gisakwat ug gihatod ngadto sa municipal health doctor nga si Dra. Theresa Gerosa   kinsa maoy mideklarar   sa biktima nga dead on arrival. Subay sa finding sa doctor nasuta nga gi-atake   sa sakit sa kasingkasing ang maong gwardiya nga maoy nakaingon sa hinanali niining kamatayon. (BANATNEWS)