Nangolekta'g basura gipriso

CEBU, Philippines - Gidakop sa mga sakop sa Eco Warden sa dakbayan sa Mandaue ang duha ka tawo nga nangulekta og mga basura sa dagkong establisamento   sa maong dakbayan ug gi-impound usab ang gidala nilang sakyanan sa miaging gabii.

Ang mga nadakpan mao ang drayber sa multicab nga si Henry Purgatorio, 36, ug Randy Jaca, 37, nga truck helper , ug pulos taga Inayawan sa dakbayan sa Sugbo.

Matud pa ni SPO1 Emmanuel Enople sa kapolisan sa Presinto 2 sa barangay sa Subangdaku sa maong dakbayan nga si Placido Jerusalem kinsa maoy pangulo sa solid waste management enforcement team sa dakbayan maoy nangulo sa pagdakop kanila ni Pugartorio ug Jaca nga nagkarga na og mga basura nga ilang gikolekta gikan sa usa ka fast food sa reclamation area.

Si SPO1 Enople miingon nga ang duha nga iyang gisukitsukit mitug-an nga gikontrata sila sa pipila ka mga dagkong establisamento sa Mandaue nga maoy mokuha sa ilang mga basura ug sila usab ang molabay niini ngadto sa basurahan.

Matud pa ni SPO1 Enople nga ang duha ka dinakpan wala makapresentar og Environment Compliance Certificate (ECC) aron pagsukod nga legal ang ilang pagpangolekta og basura sa mga establisamento sa maong dakbayan.

Gibase ni Jerusalem ang kalapasan nga nahimo sa duha ka dinakpan sa gipatumang ordinansa sa maong dakbayan nga nagdili ni bisan kinsa sa pagpataka og pangulekta og basura nga walay pagtugot sa kagamhanan ug ingon man ang pagpataka og labay sa mga kinolekta nga mga basura. (WC) (BANATNEWS)