Pag-ampo sa Senyor nakatabang

CEBU, Philippines - Lig-on nga pagtuo ni Senyor Santo Niño maoy nakaluwas nga wala maugdaw ang tunghaan sa Carreta Elementary School sa nahitabong sunog kagahapon sa buntag matud ni Helen Estoconing ang prinsipal sa maong tunghaan.

Si Estoconing nga nahinabi sa mga tigbalita atol sa sunog mibutyag nga didto sila sa Regino Mercado Elementary School sa Pahina Central mitambong sa district contest sa pagsaulog sa Buwan ng Wika.

Human niya madawat ang pahibalong adunay sunog dali silang mibalik ug mao na lay misugat kanila ang dako nang kalayo nga ilang makita sa mga bintana sa ikaduha ug ikatulong andana sa tunghaan. Sumala pang Estoconing dali niyang gikuha ang imahen sa Senyor Sto. Niño ug ‘nag-sinulog’ ug mikuha og planganitang may tubig ug gihumol ang imahen dungan sa paghangyo sa Balaang Bata nga mahunong na ang kalayo.

Si Estoconing nagtuong ang pagpangayo og panabang kang Santo Niño gidungog tungod kay wala mokatap sa ilang tunghaan ang kalayo. 

Atol sa sunog usa ka maestra sa grade 4 ug grade leader sa maong tunghaan nga si Ruth Cabaron nawad-an og panimuot diha sa ikaduhang andana ug daling gitabang sa mga rescuer.

Si Salostiano Jimenez, assistant school division superintendent mikanselar sa klase samtang excuse ang mga tinun-ang nasunogan ug pakuhaon nalang og remedial instruction. (BANATNEWS)