CEBU, Philippines - Gilungkab ang Aspac Bank sa barangay Cogon siyudad sa Bogo atol sa pagsaulog sa kapistahan usab sa maong lugar kagahapon sa 1:15 sa kaadlawon apan alas 7:45 sa buntag na nadiskobrehan sa mga kawani.
Ang mga kawatan nigamit kini og acetylene pag-abli sa maong bangko apan gidemalas kay gamay ra nga kantidad ang ilang nadala tungod kay gituohang nahutdan og sulod ang ilang acetylene ug wala makaabli sa vault nga gisudlan sa mas dakong kwarta.
Bugtong ang petty cash lang sa lamesa sa cashier nga P400 pesos ang nasakiyo.
Matud ni PO1 Abel Nasataya sa Bogo City Police dihang nahinabi sa Banat News ang mga kawani maoy nakadiskubre sa pagpangawat nga gituohang nahitabo sa kaadlawon.
Gibutyag sa branch manager sa Aspac Bank nga si Manny Ngojo dihang na-interbyu sa DyDD aduna silay nakuha sa CCTV camera nga usa ka batan-ong lalaki.
Apan giputol sa maong lalaki ang wirings sa CCTV maong mubo ra kaayo ang ilang nakuhang video footage ug wala motingog ang burglar alarm kay giapil og putol ang wirings niini.
Apil sa na- recover ang usa ka sanggot, hand drill, gabas sa puthaw ug ang tangke sa acetylene ug gikuhaan na sa mga sakop sa Scene of the Crime Operatives og latent prints.
Matud ni Ngojo ang mga kawatan didto mo-agi sa luyong bahin sa bangko dapit sa ilang kusina ubos sa lababo pinaagi sa paglungag sa semento nga gigamitan ug barena.
Gitug-an ni Ngojo nga walay gwardiya ang ilang bangko panahon sa gabii. Ang kapulisan padayon pa sa ilang imbestigasyon sa paghimo ning balita pagtumbok sa mga suspek. - BANAT NEWS