CEBU, Philippines - Usa ka polis kinsa ubos pa sa Field Training Program (FTP) ug nadestino sa Talisay City Police Station naigo sa saag nga bala didto sa eskina Blanner ug Rabaya, sa barangay Tabunok, dakbayan sa Talisay kagahapon sa kaadlawon.
Ang biktima mao si PO1 Marc Elde Miñoza kinsa samdan sa tuhod sa bala sa wala pa matinong kalibre sa armas.
Si SPO3 Daniel Tarucan sa kapolisan sa Talisay mibutyag nga sa wala pa maigo sa saag nga bala si Miñoza , may usa ka wala mailhing batan-on kinsa giingong taga barangay Bulacao, Talisay nakit-ang naglakaw sa lugar nga nahitaboan paingon ngadto sa usa ka mall sa Tabunok.
Ang maong batan-ong gisundan og tulo ka wala hiilhing mga batan-on nga nagsakay sa motorsiklo. Pag-abot sa maong batan-on tungod sa Tabunok Elementary School usa sa mga nagsakay sa motorsiklo mipusil niini makaduha ka higayon apan wala makaigo.
Ang batan-ong gipusil midagan balik sa eskina Blanner apan gigukod kini sa tulo gihapon ka mga batan-on ug gipusil na usab makaduha ka higayon apan wala gihapon maigo.
Atol sa maong pagpamusil si Miñoza nagsakay sa iyang motorsiklo paingon nang mopauli gikan sa iyang duty ug maoy naigo sa bala nga alang unta sa usa ka batan-ong gitabangan og pusil sa maong lugar. - BANAT NEWS