Sunog 150 balay ugdaw

CEBU, Philippines - Gibana-banang mokabat sa 150 ka panimalay ang naugdaw sa nahitabong kapin usa ka oras nga sunog sa upat ka mga sitio sa barangay Carreta ug Tejero ning dakbayan sa Sugbu kagahapon sa udto.

Si Cebu City Fire Marshal Aderson Comar sa pakighinabi sa Banat News mibutyag nga ang sunog milamoy sa kabalayan sa sitio Tera Cora, sitio Sambag, sitio Laurente pulos sa barangay Tejero ug sitio Ponce 2 sa barangay Carreta ug midanyos og P2.6 milyones.

Matud pang Comar base sa nakuha nilang impormasyon nagsugod ang sunog diha sa boarding house nga iya sa usa ka Violeta Ligan. Gisusi pa sa mga arson investigators ang hinungdan niini.

Apan si Comar nagkanayon nga base sa impormasyon adunay nagluto sa maong balay ug nabiyaan kini, hinuon ilaha pa kining kompirmahon.

Si barangay kapitan Eduardo Lauron sa Carreta mibutyag sa mga tigbalita nga gibana-banang mokabat sa 80 ka panimalay ang naugdaw diha sa Ponce 2 ug kasamtangan nilang ipahimutang ang naapektahang pamilya sa Carreta Elementary School ug sa Carreta Sports Complex.

Matud pang Lauron nga ang lote sa Ponce 2 iya sa dakbayan sa Sugbu apan magpaabot pa siya sa resulta sa re-blocking sa maong sitio sa tuyo nga pagbutang og dalan aron dili maghuot ang mga bombero panahon sa sunog.

Samtang adunay gihimong emergency session kagahapon aron ideklarar nga under state of calamity ang iyang barangay.

Si Tejero barangay kagawad Gary Lao nagkanayon nga susamang emergency session ang ilang himuon sa tuyo nga makapagawas sila og hinabang sa mga biktima.

Si Mayor Michael Rama kinsa misusi sa nasunogan kagahapon walay laing unang paghulagway sa lugar kundili ‘congestion’ kun kahuot sa lugar. Si Rama nagkanayon nga kinahanglang adunay ipahigayong re-blocking ug paablihan sa kanhi mga dalan nga nabulit na karon sa mga balay. Kini human sa iyang pagsusi ang mayor miingon nga grabeng kahuot sa kabalayan ang iyang nasaksihan ug ang mga kaniadto gagmay’ng dalan misamot og kagamay.

Adunay mga dalan nga padulong sa MJ Cuenco diha sa may Tera Cora ug Ponce 2 ang naghuot tungod sa mga bungbong, paril ug mga lamesa sa mga namaligya.

“Ato ning tabangan. No matter what, they have to understand (re-blocking). We are only restoring what is ought to be. Because many years back, nindot ni pagka-porma,” matud pang Rama sa mga tigbalita.

Mipasalig hinuon kini nga kadtong maapektahan sa re-blocking dili pasagdan sa siyudad sanglit pangitaan sila og ilang kabutangan.

Si kanhi kongresista Raul del Mar ug amahan sa kasamtangang kongresista sa North District kinsa misusi usab sa nahitaboan nagkanayon nga mohatag usab sila og financial assistance base sa kung pilay nabilin sa ilang pundo karon         .

Ang alarma nadawat sa kabomberuhan 11:45 ug nakontrolar kini 1:06 sa hapon human giisa ni Comar ngadto sa Task Force Bravo ang alarma nga girespondehan kapin sa 30 ka mga fire trucks.

Ang mga mirespondeng mga bombero gikan sa kabomberuhan sa Naga, Liloan, Consolacion, Minglanilla, Talisay, Mandaue, Lapulapu ug ang Cebu City . Lakip sa miresponde mao ang mga fire volunteers gikan sa Sto. Niño Fire Brigade, Basak, Emergency Rescue Unit Foundation, Filipino-Chinese Fire Volunteers ug pribadong kompanyang may water tanker.

Si Comar nagkanayon nga human sa nahitabo nga sunog sa Tejero kapin usa ka bulan na ang nakalabay naapil na sa ilang giplanuhang i-reblocking ang nasunog nga mga sitio sa maong dapit kagahapon.

Sumala pang Comar naghuot gyud ang kabalayan maong ang mga barangay penetrator firetrucks ray nakasulod sa gagmay kaayong dalan.

Samtang usa ka Arjie Cuevas,17, ang naangol human kini matumbahi og hollowblocks sa nasunog nilang balay dihang nanguykoy kini human sa sunog. Ang batan-on gihatagan og first aid sa mga sakop sa Philippine National Red Cross volunteers tungod sa samad niini sa tikod.

Aduna say ginang kagahapon nga nangita sa ilang motorsiklo nga giingong gidayongan og aswat sa mga tawo paggawas sa karsada apan dihang ilang gipangita wala na ang ilang Honda XRM nga motorsiklo.  - BANAT NEWS