Namatay sa hazing

CEBU, Philippines - Usa ka 17-anyos nga lalaki nga gidudahang biktima sa hazing sa gang ang namatay pag-abot sa tambalanan tungod sa mga naangkong grabeng bun-og sa nagkadaiyang parte sa iyang kalawasan ilabi na sa luyo sa iyang mga paa.

Gituohan sa kapulisan nga nagpasakop ang biktima (pangalan gipugngan sa gang ug ang bun-og nga iyang naangkon resulta kini sa hazing nga sagad maoy agian sa gustong magpamiyembro.

Ang biktima nga residente sa sitio Siphay, Tres de Abril sa barangay Punta Princesa ning siyudad gidala kagahapon sa iyang ginikanan diha sa Cebu City Medical Center (CCMC) apan gideklarar kini sa mga doktor nga dead on arrival (DOA).

Ang inahan sa biktima mitug-an sa mga sakop sa Homicide Section nila ni SPO4 Alex Dacua, PO3 Edario Manatad, PO2 Leroy Baguio ug PO1 Esmer Escutor nga sa miaging gabii pasado alas-10 nananghid kanila ang biktima nga moadto sa internet café’ diha sa Punta Princesa kay kuno magduwa og online games nga Dota.

Dugang asoy sa mga ginikanan nga kagahapon sa kaadlawon nauli ang biktima sa ilang balay apan ilang nabantayan nga daghan kaayo kini’g mga bun-og sa nagkadaiyang parte sa kalawasan.

Sumala pa nga dihang ila kining gipangutana igo lang kini mitubag nga ‘nagkasuntokan lang.’

Si PO2 Edario Manatad sa Homicide Section dihang nakahinabi sa Banat News nagkanayon nga hasta sa liog ug nawong nabun-og ang biktima.

Apan ang mga ginikanan nakabantay nga naglisod kini sa paglihok ug nagping-it sa mga bun-og hinungdan nga gidali nila pagdala sa CCMC apan patay na kini pag-abot sa nahisgutang tambalanan.

Ang kapulisan nga mihimo og imbestigasyon sa maong kaso miadto sa barangay Punta Princesa dihang misusi sa mga internetan wala makadawat og impormasyong adunay nahitabong rambol sa mga batan-on nianang gabii nga nananghid ang biktima.

Si PO2 Baguio nga nahinabi sa Banat News nagkanayon nagduda silang nagpasakop og gang ang biktima ug miagi kini og initiation rites sama sa hazing.

“Posible niapil og gang unya namatay sa hazing kay grabe ka daghang bun-og ang duha ka paa sa luyo, bukton, liog ug sa uban pang parte sa lawas sa biktima, duda mi nga hazing ang namatyan,” dugang pang Baguio.Matud ni Baguio nga niadto lang bulan sa Abril miabot dinhi sa Sugbu ang biktima gikan sa Cavite ug mipuyo uban sa iyang inahan. (EIM)(BANAT NEWS)